आइपिओ निष्कासनको क्रममा पेश भएका विवरण पत्र, वित्तीय विवरण र क्रेडिट रेटिङ प्रतिवेदन लगायतका सम्पूर्ण कागजात तथा विवरणको जिम्मेवारी लिन आफू तयार रहेको घोराही सिमेन्ट इण्डष्ट्रिले उल्लेख गरेको छ।
कम्पनीले एक प्रेस विज्ञप्ति जारी गर्दै यस्तो जानकारी गराएको हो। सेयर निष्कासन खुला भइरहेकै समयमा व्यावसायिक प्रतिष्ठा र ख्यातिमाथि नकारात्मक असर पुर्याउने उद्देश्यले भ्रमपूर्ण र गलत सूचना प्रवाह भएको भन्दै कम्पनीले गम्भीर ध्यानाकर्षण भएको जनाएको छ।
बदनियतपूर्ण अनर्गल प्रचारको क्रममा उठाइएका सम्पूर्ण विषयमा पूर्ण पारदर्शी रूपमा स्पष्ट पार्न उद्योग सधै तयार रहने उल्लेख गरेको छ।
सेयरको सार्वजनिक निष्कासन हुनुभन्दा पहिले कम्पनी रजिष्ट्रारको कार्यालय, धितोपत्र बोर्ड लगायत विभिन्न नियामक निकायहरूको पूर्ण सहभागिता रहने कम्पनीले स्मरण गराएको छ।
सेयर निष्कासन स्थगन गर्ने पत्रमा घोराही सिमेन्टलाई बोधार्थ मात्र दिइएको भन्दै कम्पनीले रेटिङ प्रक्रिया विदेशका विषय विज्ञहरूको विश्लेषण र मूल्यांकनबाट हुने भएकोले यो प्रक्रिया उद्योग प्रवर्द्धकहरूले प्रभावित पारेको कुरामा कुनै सत्यता नभएको कम्पनीले प्रष्ट पारेको छ।
कम्पनीले जारी प्रेस विज्ञप्तिमा भनिएको छ 'क्रेडिट रेटिङ प्रक्रिया एक विशिष्ट प्रकारको विधिबाट सम्पन्न हुने र सो प्रक्रियामा विदेशका विषय विज्ञहरूको विश्लेषण र मूल्यांकनबाट हुने हुँदा सो प्रक्रियामा उद्योग प्रवर्द्धकहरूको तर्फबाट प्रभावित पारेको हुन सक्ने भन्ने कुरामा कुनै सत्यता नभएको प्रष्ट पार्न चाहन्छौं।'
कम्पनीले नियामक धितोपत्र बोर्डले क्रेडिट रेटिङबारे क्रेडिट रेटिङ कम्पनीबाट जानकारी लिने र झुठा प्रतिवेदनको सम्बन्धमा कानुन बमोजिमको प्रक्रिया अवलम्बन गरेपछि रोकिन गएको सेयर निष्कासन प्रक्रिया पुनः सुरू हुनेमा आफू विश्वस्त रहेको कम्पनीले उल्लेख गरेको छ।
-copy-1745411477.jpg)
-1746009348.jpg)
