सुनसरी तथा झापाका केही बैंक, वित्तीय तथा लघुवित्त संस्थाहरूको शाखामा केही व्यक्तिहरूले शाखा सञ्चालनमा अवरोध गरेपछि बैंक तथा वित्तीय संस्थाले सुरक्षा माग गरेका छन्।
आज (सोमबार) बैंक तथा वित्तीय संस्थाले संयुक्त प्रेस विज्ञप्ति जारी गर्दै आफ्ना कर्मचारी र र ग्राहकको सुरक्षाको माग गरेका हुन्।
संस्थाहरूले जारी गरेको प्रेश विज्ञप्तिमा भनिएको छ 'आज पूर्वी नेपालका केही बैंक, वित्तीय तथा लघुवित्त संस्थाहरूको शाखामा केही व्यक्तिहरूले शाखा सञ्चालनमा अवरोध गरेको, कर्मचारीहरूलाई धम्क्याएको र ग्राहकहरूलाई अत्यावश्यक बैंकिङ सेवा लिनबाट बञ्चित गरेकोमा हामी घोर निन्दा गर्दछौं। यस विषयमा सुरक्षा निकायले यथाशिघ्र आवश्यक कदम लिई शाखा सञ्चालन गर्न तथा कर्मचारी/ग्राहकको सुरक्षाका लागि माग गर्दछौं।'
नेपाल बैंकर्स संघ, डेभलपमेन्ट बैंकर्स एसोसिएसन नेपाल, नेपाल वित्तीय संस्था संघ र नेपाल लघुवित्त बैंकर्स संघले संयुक्त प्रेश विज्ञप्ति जारी गरेर सुरक्षा माग गरेका हुन्।
ऋण लिएपछि तिर्नु पर्छ भन्ने सामान्य सिद्धान्त सबैले बुझ्न पर्ने र ऋण नतिर्ने बहानामा यस प्रकारका अराजक गतिविधि गर्नेहरूलाई तुरुन्तै कारबाहीको दायरामा ल्याउनु पर्ने संघ संस्थाको जोड छ।
अत्यावश्यक सेवा क्षेत्रमा पर्ने बैंक तथा लघुवित्त संस्थाहरूको सञ्चालन तथा कर्मचारीहरूलाई आवश्यक सुरक्षा प्रदान गरिदिन सरोकारवालासँग संस्थाहरूले अनुरोध गरेका छन्।
आगामी दिनमा यस प्रकारका कुनै पनि गतिविधिहरू भएको खण्डमा यसका विरुद्ध सशक्त रुपमा प्रस्तुत हुने बैंकिङ संघ-संस्थाको चेतावनी छ।
भूकम्पपछि वा कोभिडको महामारी लगायतका कुनै पनि विषम परिस्थितीमा आफ्नो ज्यानको परवाह नगरी बैंक, वित्तीय संस्था तथा लघुवित्त क्षेत्रका कर्मचारीहरू अहोरात्र आफ्ना ग्राहकहरूलाई सेवा पुर्याउन खटिएको संस्थाहरूले स्मरण गराएका छन्।
-copy-1745411477.jpg)
-1746009348.jpg)
