मंगलबारदेखि एक हप्ताको लागि आन्तरिक हवाई उडान बन्द गर्ने सरकारले निर्णय गरेको छ।
कोरोना रोकथाम उच्चस्तरीय समितिको आज बसेको बैठकले चैत ११ गते (मंगलबार) देखि एक हप्ताका लागि उडान बन्द गर्ने निर्णय गरेको हो।
सुरक्षा निकायबाट प्रयोग हुने वायुयान र तोकिएका अन्य उडानहरू बाहेक अन्य सबै आन्तरिक व्यवसायिक उडानहरू बन्द गर्ने निर्णय भएको हो।
कोरोना संक्रमणको जोखिम फैलिएपछि उक्त निर्णय गरिएको हो।
पछिल्लो समय सडकभन्दा विमानस्थलमा भीडभाड धेरै भएपछि सरकारले उक्त निर्णय लिएको हो।
सरकारले आजदेखि लामो दूरीमा चल्ने गाडी तथा अन्तर्राष्ट्रिय उडान बन्द गराएको थियो।
आजै एक जना थप कोरोना संक्रमित भेटिएपछि सरकारले आन्तरिक उडान पनि बन्द गर्ने निर्णय गरेको हो नेपाल नागरिक उड्डयन प्राधिकरणका महानिर्देशक राजन पोखरेल जानकारी दिए।
यो निर्णयले भोलिका लागि बुकिङ भएका टिकट रद्द हुनेछन्।
एयरलाइन्सहरूलाई निशुल्क रिफन्ड गर्न नेपाल नागरिक उड्डयन प्राधिकरणले निर्देशन दिने निर्णय भएको छ।