नेपालमा पर्यटन, वातावरण र जीवनशैलीमा नवीनतम नवप्रवर्तन ल्याउने उद्देश्यसहित ‘नेपाल आइडिया फर वर्ल्डले अन्तर्राष्ट्रिय स्तरको ‘डोम हाउस’ नेपालमा भित्र्याएको छ।
स्काई टावर काठमाडौंमा आयोजित कार्यक्रममा २५ वटा डोम हाउसको शुभारम्भ गरिएको हो।
सांस्कृति, पर्यटन तथा नागरिक उड्डयनमन्त्री बद्रीप्रसाद पाण्डे डोम हाउस उद्घाटन गरेका हुन्।
उनले निजी क्षेत्रको नवीनतम प्रयासको प्रशंसा गरेका छन्।
‘नेपालजस्तो पर्यटकीय गन्तव्यका लागि डोम हाउस निकै प्रभावकारी हुन सक्छ। निजी क्षेत्रलाई सरकारले प्रोत्साहन गर्छ र झन्झटिला कानुन संशोधन गरिनेछ,’ उनले भने।
संस्थाका निर्देशक सन्तोष सुवेदीले डोम हाउस परियोजनाले “प्रभावका लागि नवप्रवर्तन, प्रगतिको लागि साझेदारी” भन्ने मूल नारालाई आत्मसात् गरेर अगाडि बढ्ने बताए।
यस परियोजनाले नेपालमा हरित प्रविधिमा आधारित, पर्यावरणमैत्री, स्वदेशी डिजाइन र निर्माणमा आधारित प्रवृत्तिलाई बढावा दिने उनको भनाइ छ।
के हो डोम हाउस? डोम हाउस एक अत्याधुनिक, पारदर्शी र मोड्युलर संरचना हो, जसलाई पर्यटन, स्वास्थ्य तथा वातावरण मैत्री जीवनशैलीसँग जोडेर डिजाइन गरिएको हो। यसमा रिसोर्ट, होमस्टे, रेस्टुरेन्ट, मिडिया स्टुडियो, निजी कार्यालय, वा विभिन्न कार्यक्रमका स्पेसको रूपमा प्रयोग गर्न सकिन्छ।
नेपाल आइडिया फर वर्ल्डका प्रमुख कार्यकारी अधिकृत उषा खतिवडाले 'यो शुभारम्भ केवल व्यावसायिक उपलब्धि होइन, नेपालले नवप्रवर्तन र दिगो जीवनशैलीतर्फ अग्रसर हुने संकेत पनि हो’ भनेकी छन्।
-1746009348.jpg)
