अमेरिका र चीनले व्यापार युद्ध थाँती राख्दै वार्ताको तयारी थालेका छन्। दुबै देश एक-अर्काका सामानमा लगाउने करमा लचिला बनेका छन्।
त्यसले विश्व बजारमा नौलो र सकारात्मक संकेत मिलेको छ।
चीनले बुधबारदेखि औषधीलगायत केही अमेरिकी सामानमा कर नलाउने घोषणा गरेको छ।
अमेरिकाले चीनको उक्त निर्णयको स्वागत गरेको छ र कतिपय सामानमा कर लगाउने कुरा केही समयका लागि स्थगित गरेको छ।
अमेरिकी राष्ट्रपति डोनाल्ड ट्रम्पले चीनले सामानमा कर छुट दिनु ठूलो कदम भएको प्रतिकृया दिएका छन्। उनले दुई देशका वार्ता टोलीको वासिङट्नमा भेट हुनुपूर्वको यो राम्रो खबर भएको बताएका छन्।
अमेरिका र चीनबीच सेप्टेम्बर अन्त्यमा वासिङट्नमा व्यापार वार्ता हुँदैछ। वार्ताको मिति भने तय हुन बाँकी छ।
‘उनीहरूले केही कदम चालेका छन्, त्यो राम्रो छ,’ ट्रम्पले भनेका छन्, ‘मलाई लाग्छ यो निकै राम्रो संकेत हो।’
बुधबार नै ट्रम्पले ट्वीट गर्दै अमेरिकाले चिनियाँ २५० अर्ब डलरको सामानमा १ देखि १५ अक्टोबरसम्म बढ्न लागेको कर केही समयको लागि पछि सारेको घोषणा गरेका थिए।
‘म उनीहरूसँग काम गर्छु, मैले चिनेको छु र उनीहरू मलाई मन पनि पर्छ,’ उनले भने, ‘आशा छ म केही गर्न सक्छु ।’
अमेरिका र चीनबीचको व्यापार युद्धमा गर्दा सकारात्मक संकेत देखिएपछि बुधबार भने एसियाली सेयर बजार उकालो लागेको छ। बुधबार चिनियाँ मुद्रा पनि ०.२७ प्रतिशतले बढ्यो।