स्थायी कमिटी बैठकमा प्रधानमन्त्रीका सल्लाहकार रिमालले पेश गरे सरकारका ‘राम्रा काम’को सूची

‘सरकार ढलेपछि मात्रै तगडा भन्ने परम्परा भइसक्यो’

सेतोपाटी संवाददाता

काठमाडौं, पुस ३

नेकपा स्थायी समिति सदस्य एवम् प्रधानमन्त्रीका प्रमुख राजनीतिक सल्लाहाकार विष्णु रिमालले चालु आर्थिक वर्षको पहिलो तीन महिनामै १२० वैदेशिक लगानी सम्बन्धी उद्योगहरू दर्ता भएको तथ्यांक पेश गरेका छन्।

स्थायी कमिटीको जारी बैठकमा लिखित सुझाव राख्दै रिमालले यो अवधिमा करिब १९ अर्ब ६० करोड लगानी गर्ने गरी वैदेशिक उद्योगहरू दर्ता भएको उल्लेख गरेका छन्।

यो अवधिमा उद्योगको संख्या १३ हजार १ सय ५५ पुगेको उनले दाबी गरेका छन्। जसमा ठूला २८, मझौला ४९ र घरेलु तथा उद्योग १३ हजार ३८ रहेका छन्।

‘गत आर्थिक वर्ष ८ प्रतिशतको हाराहारीमा रहेको उद्योग क्षेत्रको वृद्धि चालु वर्षको अन्त्यमा झण्डै दोब्बर हुने अपेक्षा गरिएको छ,’ रिमालले आफ्नो प्रतिवेदनमा भनेका छन्, ‘पर्यटकस्तरीय (११२५) र तारे होटल (१२९) को संख्यामा बृद्धि भएको छ। पर्यटक आगमनको संख्यामा पनि बृद्धि भएको छ।’

सरकारी कोषमा बचत रहेको भन्दै रिमालले आर्थिक वर्ष २०७४/७५ मा भन्दा २०७५/0७६ मा वैदेशिक सहायताको प्रतिवद्धता झण्डै २७ प्रतिशतले बढेको दाबी गरेका छन्।

रिमालका अनुसार असारयता र ७२ अर्ब ३० करोड रुपैयाँ बराबरको प्रतिवद्धता भइसकेको छ। गत आर्थिक वर्षको सोही अवधिको तुलनामा यस आर्थिक वर्षको पहिलो चौमासिकमा निर्यात २३.४ प्रतिशतले बढेको र ६.९ प्रतिशतले आयात घटेको अनि व्यापार घाटा पनि ८.९ प्रतिशतले घटेको रिमालको दाबी छ।

सरकारका काम कारबाही सन्तोषजनक नभएको भनेर स्थायी कमिटीमा बोल्नेहरूलाई जवाफ दिने शैलीमा रिमालले सरकारले गरेका कामको फेहरिस्त पेश गरेका हुन्।

आफ्नो लिखित सुझावमा रिमालले भनेका छन्, ‘गत आर्थिक वर्षमा ३ हजार ५४२ करोडले घाटामा रहेको शोधनान्तर चालु आर्थिक वर्ष १४४३ करोडले बचत भएको छ। विदेशी विनिमय सञ्चिति झन्डै ९ महिनाको वस्तु तथा सेवाको आयात धान्न सक्ने अवस्थामा छ।’

संयुक्त राष्ट्र संघीय विकास कार्यक्रमले गत हप्ता प्रकाशित गरेको मानव विकास प्रतिवेदन अनुसार नेपाल १४९औं बाट १४७ औं स्थानमा उक्लिएको समेत रिमालले उल्लेख गरेका छन्।

यसबीचमा १६ अर्बमाथिको बिगोसहितको कारबाही राजश्व अनुसन्धान विभागले गरिसकेको रिमालले बताएका छन्। सरकार नढलेसम्म सरकारले राम्रो काम गरेन भन्ने प्रवृत्ति २०५१ सालदेखिकै रहेको उनको भनाइ छ।

‘हाम्रो आनीबानी ०५१ सालदेखि नै सरकार नढलेसम्म सरकारले राम्रो काम गर्‍यौं भनिएको जानकारी मलाई छैन,’ रिमालले भनेका छन्, ’मरेपछि नेता महान हुने, ढलेपछि सरकार तगडा गनिने परम्परा हामीले थेगेका छौं।’

कहिले पार्टीमा सल्लाह नगरेको आरोप, कहिले पार्टी कमिटीलाई किन साक्षी बसेको भन्ने कुरा सुहाउँदो टिप्पणी नरहेको भन्दै रिमालले वरिष्ठ नेताहरूबाट यस्ता टिप्पणी आउनु प्रधानमन्त्रीप्रतिको पूर्वाग्रह रहेको आरोप लगाएका छन्। सचिवालय सदस्यको संख्या ९ जना नै उपयुक्त रहेकाले यसलाई थप्न जरुरी नरहेको रिमालले उल्लेख गरेका छन्।

प्रकाशित मिति: बिहीबार, पुस ३, २०७६, ११:०८:००

सिफारिस