झापाका पाँचवटै निर्वाचन क्षेत्रमा राष्ट्रिय स्वतन्त्र पार्टी (रास्वपा) ले 'क्लिन स्विप' गर्ने देखिएको छ। यी सबै क्षेत्रमा रास्वपाका उम्मेदवार अग्रस्थानमा छन्।
झापा-५ मा रास्वपाका वरिष्ठ नेता बालेन शाह करिब १७ हजार मतले अगाडि छन्।
निर्वाचन आयोगका अनुसार बालेनले २२ हजार ७४२ मत प्राप्त गरेका छन्। उनका निकट प्रतिस्पर्धी नेकपा एमालेका उम्मेदवार केपी शर्मा ओलीले ५ हजार ८६४ मत प्राप्त गरेका छन्।
तेस्रो स्थानमा रहेका श्रम संस्कृति पार्टीका उम्मेदवार समिर तामाङले २ हजार ६९३ मत प्राप्त गरेका छन्।
झापा-४ मा पनि रास्वपाका उम्मेदवार शम्भुप्रसाद ढकाल अग्रस्थानमा छन्। उनले ६ हजार ५३३ मत प्राप्त गरेका छन्। उनका निकट प्रतिस्पर्धी नेकपा एमालेका लालप्रसाद साँवा लिम्बूले १ हजार ८४१ मत प्राप्त गरेका छन्।
झापा-३ मा रास्वपाका प्रकाश पाठकले १३ हजार ८४९ मत प्राप्त गरेका छन् भने दोस्रो स्थानमा रहेका राष्ट्रिय प्रजातन्त्र पार्टीका उम्मेदवार राजेन्द्र लिङ्देनले ६ हजार ३०० मत प्राप्त गरेका छन्।
झापा-२ मा रास्वपाकै उम्मेदवार इन्दिरा रानामगर अगाडि छिन्। उनले १३ हजार ६६९ मत प्राप्त गरेकी छन् भने उनका निकट प्रतिस्पर्धी नेकपा एमालेका उम्मेदवार देवराज घिमिरेले २ हजार ३३९ मत प्राप्त गरेका छन्।
झापा-१ मा पनि रास्वपाका उम्मेदवार निशा डाँगी आफ्ना प्रतिस्पर्धीभन्दा दोब्बर मतले अगाडि छन्। उनले १२ हजार ९०१ मत प्राप्त गरेकी छन्। उनका निकट प्रतिस्पर्धी श्रम संस्कृति पार्टीका केवलराम राईले ३ हजार ६९२ मत प्राप्त गरेका छन्।
-1746009348.jpg)
