माघ २९ गते नेकपाका प्रदेश सांसद रामेश्वर फुँयालले बागमती प्रदेशको भौतिक तथा योजना मन्त्रीको शपथ लिने कार्यक्रम तय भएको थियो।
फुयाँललाई मन्त्री नियुक्त गरेपछि शपथका लागि मुख्यमन्त्री डोरमणी पौडेलले तयारी गरेका थिए। फुयाँल पनि शपथका लागि तयार थिए।
अन्तिम अवस्थामा आएर उनको शपथ रोकिन पुग्यो। त्यसको प्रमुख कारण थियो— पार्टीभित्रको आन्तरिक विवाद।
श्रोतका अनुसार बागमती प्रदेश इन्चार्ज अष्टलक्ष्मी शाक्यले अविश्वासको प्रस्ताव ल्याउने चेतावनी दिएपछि फुँयालको शपथ रोकिएको हो। छलफल र सहमति गरेर मात्रै मन्त्री नियुक्त गर्न शाक्यले गरेको आग्रहलाई मुख्यमन्त्री पौडेलले नटेरेपछि शाक्यले सो चेतावनी दिएको श्रोतले बतायो।
तीन नम्बर प्रदेश सरकारमा अहिले एक जना पनि महिला मन्त्री छैनन्। यसपालि मन्त्रिमण्डलमा महिला सहभागी गराउनु पर्छ भन्ने शाक्यको धारणा थियो।
मुख्यमन्त्री पौडेलले आफ्नो आग्रह नमान्ने देखेपछि शाक्यले प्रधानमन्त्री एवम पार्टी अध्यक्ष केपी ओली र अर्का अध्यक्ष पुष्पकमल दाहाल प्रचण्डलाई समेत यसबारेमा जानकारी गराएकी थिइन्।
श्रोतका अनुसार प्रचण्डले शाक्यलाई साथ दिएका थिए भने प्रधानमन्त्री ओली मौन रहेका थिए।
प्रदेश पार्टी कमिटीबाट चर्को दबाब आएपछि र केन्द्रबाट समेत साथ नपाएपछि मुख्यमन्त्री पौडेल पछाडि हटेका हुन्।
समय तय भएर पनि किन रोकियो तपाईंको शपथ भन्ने जिज्ञासामा फुयाँलले आफू ‘कठिन यात्रामा रहेको र यसमै रमाउने’ बताए।
‘हुन्छ हुन्छ जस्तो हुन्न जस्तो, फेरी हुन्छ जस्तो राजनीतिमा यस्तो चलिरहन्छ। मन्त्रीको छनोट भएको छ भन्ने सुनेको छु। प्रदेश प्रमुखको कार्यालयबाट सूचना आएको छैन। तसर्थ म धैर्यतासाथ कुरिरहेको छ,’ फुयाँलले भने, ‘ रामेश्वर फुयाँल एउटा पेच किला हो। नेपाल कम्युनिष्ट पार्टीले जहाँ जोड्न उचित ठान्छ त्यही जोडिन्छ।’
फुयाँल नेकपा बागमती प्रदेश संसदीय दलका प्रमुख सचेतक हुन्। प्रधानमन्त्री ओली निकटका फुयाँल काठमाडौं क्षेत्र नं ३ बाट प्रदेश सभा सदस्य निर्वाचित भएका हुन्। उनी यसअघि दोश्रो संविधासभामा काठमाडौं क्षेत्र नं ३ बाट निर्वाचित भएका थिए।
पार्टीसँग समन्वय नगरिकन मन्त्री नियुक्त गरेकोले मन्त्रीको सपथ रोकिएको नेकपा केन्द्रीय सदस्य एवम् बागमती प्रदेशकी सांसद रचना खड्काले सेतोपाटीलाई बताइन्।
‘प्रदेश सरकारले प्रदेश पार्टी कमिटिसँग समन्वय गर्नुपर्छ। त्यो भएन भने सरकार चल्न सक्दैन,’ उनले भनिन्, ‘बागमती प्रदेश सरकारको मन्त्रिपरिषद महिलाविहीन छ। त्यतातिर समेत ध्यान नदिइकन एकलौटी ढंगले निर्णय गर्न खोज्दा मन्त्रिपरिषद विस्तार हुन नसकेको हो।’
२०७५ कात्तिक १६ गते तत्कालीन भौतिक मन्त्री केशव स्थापितलाई मुख्यमन्त्रीले बर्खास्त गरेपछि यो मन्त्रालय मुख्यमन्त्रीले नै जिम्मा लिएका छन्।
प्रदेश सांसद समेत रहेकी बागमती प्रदेश इन्चार्ज शाक्यले समावेशी बनाएर सरकारलाई पुर्णता दिन आग्रह गरेकी थिइन्।
६ सदस्यीय बागमती प्रदेश सरकारमा १ जना पनि महिला छैनन्।
