सेयर बजारमा वित्त (फाइनान्स) कम्पनीको राम्रो छाप छ।
त्यसमा पनि अहिले सबभन्दा धेरै मूल्य हुने दुई कम्पनी हुन्, मञ्जुश्री फाइनान्स र आइसिएफसी फाइनान्स।
पहिले कुरा गरौं मञ्जुश्री फाइनान्सको।
अहिले मञ्जुश्रीको सेयर प्रतिकित्ता सात सय १९ रूपैयाँमा कारोबार भइरहेको छ। कुनै समय यसको सेयर मूल्य एक हजार तीन सय रुपैयाँसम्म पुगेको थियो।
करिब चार–पाँच महिनाको अन्तरालमा मञ्जुश्रीको सेयर मूल्य यसरी पाँच सय रूपैयाँ हाराहारीबाट १४ सय ५६ रूपैयाँसम्म पुगेको थियो।
यसरी मूल्य १४ सय रूपैयाँसम्म पुग्नुमा कम्पनीले सो समय घोषणा गरेको बम्पर लाभांश रहेको देखिन्छ। मञ्जुश्रीले आर्थिक वर्ष २०७७/७८ को नाफापछि ४० प्रतिशत बोनस सेयरसहित कुल ४६ प्रतिशत लाभांश दिएको थियो।
त्यसयता भने सेयर मूल्य ९ सय रूपैयाँ आसपाससम्म पुग्दै आएको छ।
मञ्जुश्री अहिले पनि वित्त कम्पनीहरूमध्ये महँगो हुनुमा केही कारण छन्।
यसले २०७७/७८ पछि एक पटक लाभांश दिएन, त्यसबाहेक नियमित दिइरहेको छ। ५ देखि ६ प्रतिशत हाराहारी लाभांश दिएको मञ्जुश्रीले गत आर्थिक वर्ष २०८१/८२ को नाफापछि हालै १५ प्रतिशत नगद लाभांश दिएको छ।
मञ्जुश्रीले प्रकाशन गरेको आर्थिक वर्ष २०८२/८३ को पहिलो त्रैमासिक वित्तीय विवरण अनुसार यो लाभांश दिएपछि पनि १४ करोड वितरणयोग्य रकम छ। यो रकमबाट अहिले नै १० प्रतिशत लाभांश दिन सक्ने क्षमता बनेको छ। वार्षिक अन्त्यसम्मको आम्दानीपछि यो क्षमता थप बढ्न सक्छ।
वित्तीय विवरण अनुसार मञ्जुश्री नाफाको लगभग ५० प्रतिशतले घटे पनि रकम आधारमा १५ कम्पनीमध्ये पहिलो स्थानमा छ। यसको नाफा ९ करोड ४२ लाखबाट घटेर ४ करोड ६३ लाख रूपैयाँ भएको छ। कुल १५ मध्ये आठ कम्पनी भने नोक्सानमा छन्।
प्रतिसेयर आम्दानी उल्लेख्य रूपमा घटे पनि यो सूचकमा पनि पहिलो स्थानमै छ। यसको प्रतिसेयर आम्दानी २७ रूपैयाँ ८९ पैसाबाट घटेर १३ रुपैयाँ ७३ पैसा भएको छ।
वित्त कम्पनीहरूको निस्क्रिय कर्जा ५.३ प्रतिशतसम्म हुँदा मञ्जुश्री सबैभन्दा कम हुनेमध्ये तेस्रो स्थानमा छ। मञ्जुश्रीको यस्तो निस्क्रिय कर्जा ४.१३ प्रतिशत छ।
मञ्जुश्रीको ब्याज आम्दानी घटे पनि अन्य आम्दानीबाट हुने कमाइ बढेकाले नाफालाई सहयोग पुगिरहेको देखिन्छ।
पुस ७ गतेयता लगातार बढेको मञ्जुश्रीको सेयर मूल्य सोमबार घटेको छ।
आइतबार र सोमबारको कारोबार हेर्दा मूल्यमा हरामी क्रस बियरिस आकृति बनेको छ। यसले मूल्य केही समय घट्ने संकेत गर्छ। मूल्य बढ्ने अवस्था कमजोर बन्दै गएको यसको संकेत हो। यद्यपि आगामी दिनको कारोबार हेरेर निर्णय लिनु सही हुन्छ।
त्यस्तै, अहिले आइसिएफसी फाइनान्सको सेयर प्रतिकित्ता ६ सय ३६ रूपैयाँमा कारोबार भइरहेको छ।
कुनै समय भने यसको सेयर मूल्य करिब एक हजार दुई सय रूपैयाँसम्म पुगेको थियो। पछिल्लो केही वर्षयता आठ सय ५० रूपैयाँभन्दा माथि जान सकेको छैन।
आइसिएफसी अहिले वित्त कम्पनीहरूमध्ये महँगो हुनुमा केही कारण छन्।
विगत १५ वर्षयताको इतिहास हेर्ने हो भने कम्पनीले सधैं लाभांश दिएको छ। तथ्यांक उपलब्ध भएको सो अवधियता कुनै वर्ष लगानीकर्ताको हात खाली गरेको देखिँदैन।
१५ वर्ष अवधिमा चार वर्ष छाडेर लाभांश दर १३ प्रतिशत माथि छ। यो अवधिमा आइसिएफसीले अधिकतम २१ प्रतिशतसम्म लाभांश दिएको छ।
गत आर्थिक वर्ष २०८१/८२ को नाफापछि यसले हालै १५.७८ प्रतिशत नगद लाभांश दिएको छ।
आइसिएफसीले प्रकाशन गरेको आर्थिक वर्ष २०८२/८३ को पहिलो त्रैमासिक वित्तीय विवरण अनुसार यसले यो सञ्चित कोषको रकमबाट लाभांश दिइसकेकाले अब करिब तीन करोड २६ लाख रकम रहने देखिन्छ।
यो रकमबाट आइसिएफसीले २.७५ प्रतिशत लाभांश दिन सक्ने क्षमता बनेको छ। वार्षिक अन्त्यसम्मको आम्दानीपछि यो क्षमता थप बढ्न सक्छ।
वित्तीय विवरण अनुसार नाफा लगभग ६७ प्रतिशतले घटे पनि रकम आधारमा आइसिएफसी १५ कम्पनीमध्ये तेस्रो स्थानमा छ।
यसको नाफा ६ करोड ६८ लाखबाट घटेर २ करोड २४ लाख रूपैयाँमा भएको छ।
त्यस्तै, प्रतिसेयर आम्दानी उल्लेख्य रूपमा घटे पनि यो सूचकमा चौथो स्थानमा छ। आइसिएफसीको प्रतिसेयर आम्दानी २३ रूपैयाँ २५ पैसाबाट घटेर ७ रूपैयाँ ५९ पैसा भएको छ।
आइसिएफसी निस्क्रिय कर्जा सबभन्दा कम हुनेमध्ये पहिलो स्थानमा छ। यसको निस्क्रिय कर्जा २.७७ प्रतिशत छ।
अन्य आम्दानी घटे पनि आइसिएफसीको मुख्य व्यवसायबाट हुने कमाइ (ब्याज आम्दानी) बढेकाले नाफालाई सहयोग पुगिरहेको देखिन्छ।
केही समयदेखि यसको सेयर मूल्यमा सामान्य उतारचढाव भइरहेको छ।
आइतबार र सोमबारको कारोबार हेर्दा मूल्यमा पहिलो दिन मूल्य बढेर हरियो मैनबत्ती बनेको छ। दोस्रो दिन बजार घटेर लामो माथिल्लो धागोसहितको सानो शरीर भएको रातो मैनबत्ती आकृति बनेको छ।
यसले मूल्य घट्ने संकेत गर्छ। यो दरिलो संकेतजस्तो देखिँदैन।
पाँच दिने मुभिङ एभरेज रेखाले २० दिने रेखा पार गरेर माथि लाग्न थालेको जस्तो देखिन्छ। यसो भएमा मूल्य केही समय बढ्न सक्छ।
तर पनि आगामी दिनको कारोबार हेरेर मात्रै निर्णय लिनु सही हुन्छ।
-1746009348.jpg)
