स्वास्थ्य तथा शिक्षा सेवामा हरेक नागरिकको समान पहुँचको सुनिश्चितताको माग राख्दै सत्याग्रह सुरु गरेका डा. गोविन्द केसीलाई तत्काल अस्पतालमा लैजान साझा पार्टीले आग्रह गरेको छ।
केसीले जुम्लाको रानिचौरस्थित बाबिरामष्ट मन्दिर परिसरमा शुरु गरेको सत्याग्रहप्रति ऐक्यवद्धता जनाउन पुगेको साझा पार्टीको टोलीले सो माग राखेको हो।
डा केसीको स्वास्थ्य यो पटक सत्याग्रहको पाँचौ दिनमै नाजुक बनेको चिकित्सकहरूले बताएका छन्। उनलाई तुरून्तै सुविधासम्पन्न अस्पतालमा स्थानान्तरण गर्नु पर्ने चिकित्सकहरूको सुझाव छ।
साझा पार्टीले एक विज्ञप्ति जारी गर्दै डा केसीको स्वास्थ्य तलमाथि भएमा त्यसले जनतामा धैर्यको बाँध टुटाउने जनाएको छ।
विज्ञप्तिमा भनिएको छ ‘डा केसीले समतामूलक, भ्रष्टाचाररहित र न्यायपूर्ण समाजका लागि राखेका मागहरू आफूलाई समाजवादी भन्ने कम्युनिस्ट सरकारको आफ्नै एजेण्डा हुनु पर्ने हो। तर विडम्वनाको कुरा, सामान्य अवस्था होस् या अहिले कोभिड १९ को असामान्य अवस्था, सरकार भ्रष्टाचार, नातावाद र कृपावादमा मात्र होइन लोकतन्त्र र संविधानकै धज्जी उडाउनेगरी चोर बाटोबाट नियुक्ति र मनोनयन गर्नमा व्यस्त छ।’
-1746009348.jpg)
