आन्तरिक विवाद चुलिएको नेकपा (एमाले) को पार्टी कार्यालयका सचिव शेरबहादुर तामाङले आइतबार केन्द्रीय कमिटी सदस्यहरूलाई पठाएको सूचनामा सोमबार च्यासलस्थित तुलसीलाल अमात्य प्रतिष्ठानमा बस्ने पार्टी केन्द्रीय कमिटीको १४ औं बैठकबारे जानकारी थियो।
सोमबार बैठक सुरू हुने बेलासम्म भने बैठक बस्ने स्थान र समय उही थियो तर बैठक १४ औं नभएर १०औंमा पुगेको थियो।
एमाले अध्यक्ष केपी शर्मा ओलीले बोलाएको उक्त बैठक १०औं हुनुका पछाडि कारण छन्।
नेकपा (माओवादी केन्द्र) सँग एकता हुनुअघि २०७५ जेठ ३ गते एमालेको ९ औं केन्द्रीय कमिटी बैठक बसेको थियो। प्रधानमन्त्री निवास बालुवाटार बसेको एमालेको उक्त बैठकपछि पार्टी नेकपा भयो।
झन्डै तीन वर्षपछि गत फागुनमा सर्वोच्च अदालतको फैसलाले एमाले र माओवादी केन्द्र फरक-फरक भए।
सर्वोच्चको आदेशअनुसार एमाले छुट्टै पार्टी बने पनि विवाद उत्कर्षमा पुगेको थियो। अध्यक्ष ओलीसँग नेताहरू माधवकुमार नेपाल र झलनाथ खनालको तिक्तता बढेको थियो। त्यही बेला ओलीले एकलौटी रूपमा पार्टीका केन्द्रीय कमिटी बैठक बोलाएका थिए।
उनले फागुन २८ गते प्रधानमन्त्री निवास बालुवाटारमा पार्टीका १० औं र ११औं बैठक गरेका थिए भने चैत ७ गते १२ औं बैठक गरेका थिए।
१६ दिनअघि ओली समूहले बालुवाटारमै बसेको बैठकलाई केन्द्रीय कमिटीको १३ औं बैठक भनेको थियो।
२०७७ फागुन २८ पछि बसेका यी केन्द्रीय कमिटी बैठकले माओवादी केन्द्र छोडेर आएका नेताहरूलाई जिम्मेवारी दिनेदेखि खनाल-नेपाल पक्षीय नेताहरूलाई कारबाही गर्ने र महाधिवेशन आयोजक कमिटी बनाउनेलगायत निर्णय गरेका थिए।
नेपाल समूहले ती बैठकको वैधतामाथि प्रश्न उठाउँदा आएको थियो। दुबै पक्षका नेता सम्मिलित पार्टी विवाद समाधान समितिले तयार पारेको १० बुँदे सहमति प्रस्तावमा पार्टीलाई २०७५ जेठ २ कै अवस्थामा फर्काउने उल्लेख छ।
सोहीअनुसार बालुवाटारमा बसेका चार बैठक खारेज गर्दै पार्टीको आज १० औं केन्द्रीय कमिटी बैठक बोलाइएको सचिव शेरबहादुर तामाङले जानकारी दिए।
ओली समूहले बालुवाटारका बैठकलाई खारेज गरी १० औं बैठक बोलाए पनि नेपाल समूहका केन्द्रीय सदस्य भने आजको बैठकमा सहभागी छैनन्।
एकपक्षीय रूपमा बैठक बोलाइएकाले आफूहरू सहभागी नभएको उनीहरूले बताएका छन्।