रूपन्देहीको तिलोत्तमा नगरपालिकाका प्रमुख रामकृष्ण खाणले हाल लिँदै आएको करको दरमा कुनै परिवर्तन नगर्ने निर्णय कार्यपालिका बैठकको सर्वसम्मत निर्णय भएको बताएका छन्।
गत असार ५ गते बसेको नगर कार्यपालिकाको बैठकले हालको करको दर रेटमा कुनै पनि परिवर्तन नगर्ने सर्वसम्मत् निर्णय गरे पनि कतिपय मिडियाहरूमा गलत समाचार सम्प्रेषण भएको भन्दै उनले त्यसबारे स्पष्ट पारेको जनाएका छन्।
नगरप्रमुख खाणले बिहीबार विज्ञप्ति जारी गर्दै कार्यपालिका बैठकमा सर्वसम्मत निर्णय भएको विषयलाई केही मिडियामा र व्यक्तिहरूले कुनै पार्टी विशेषलाई आरोप लगाएर समाचार सम्प्रेषण गरेको भन्दै त्यसबारे स्पष्ट पारेका हुन्।
‘आर्थिक वर्ष ०७९/०८० मा कुनै पनि करका दर परिवर्तन नगर्ने विषय कार्यपालिका बैठकमा सर्वसम्मत निर्णय भएकोमा विभिन्न अनलाइन मिडिया तथा सामाजिक सञ्जालमा सामूहिक निर्णय विपरीतका समाचार र टिप्पणीहरू सम्प्रेसित र प्रकाशित भएकोमा तिलोत्तमा नगर कार्यपालिका बैठकको गम्भीर ध्यानाकर्षण भएको छ।’ खाणद्वारा जारी विज्ञप्तिमा भनिएको छ।
विज्ञप्तिमा करका दरहरू परिवर्तन नगर्ने विषय नेपाली कांग्रेस र नेकपा (एमाले) को तर्फबाट निर्वाचित सबै कार्यपालिकाका जनप्रतिनिधिको सर्वसम्मत निर्णय भएको समेत उल्लेख गरेका छन्।
एमालेका निर्वाचित जनप्रतिनिधिले नगर प्रमुखको अध्यक्षतामा बसेको कार्यपालिकाको सिंगो बैठकले गरेको सर्वसम्मत् निर्णयलाई एमालेको दबाबमा स्वीकार गरिएको भन्दै समाचार सार्वजनिक भएको र कांग्रेसका नेताले समेत सामाजिक सञ्जालमा भ्रमपूर्ण सूचना लेखेपछि आपत्ति जनाउँदै आएका थिए।
एमालेबाट निर्वाचित जनप्रतिनिधिहरूले सिंगो कार्यपालिकाले गरेको निर्णयलाई कुनै पार्टी विशेषलाई आरोप लगाउन नमिल्ने भन्दै नगरपालिकाले यसबारे स्पष्ट नपारेसम्म र सार्वजनिक गरिएको गलत सूचनालाई नसच्चाएसम्म नगरसभा अघि नबढ्ने अडान राख्दै आएका थिए। उनीहरूको सोही अडानको कारण असार ७ गते हुने भनिएको नगरसभा हुन सकेको थिएन।
कार्यपालिका बैठकका निर्णय सार्वजनिक नहुँदै कांग्रेस नेता रोमणिप्रसाद पाठकले केही करको दायरा घटाउने कांग्रेसको प्रस्तावमा एमालेले अस्वीकृत गरेको आरोप लगाउँदै सामाजिक सञ्जाल फेसबुकमा स्टाटस लेखेका थिए।
कार्यपालिकाले गरेको निर्णय एमालेविरूद्ध प्रयोग गरिएको भन्दै एमालेबाट निर्वाचित कार्यपालिका सदस्यले विरोध गरेपछि तीन दिनदेखि कार्यपालिका बैठक अवरूद्ध हुँदै आएको थियो।
एमालेबाट निर्वाचित सदस्यहरूले नगरपालिकाले संस्थागत रूपमै गल्ती सच्याउनुपर्ने अडान नछाडेपछि बिहीबार नगरप्रमुख खाणले विज्ञप्ति लेखेर नै स्पष्ट पारेका हुन्।