परराष्ट्र मन्त्री एनपी साउद र संयुक्त राज्य अमेरिकाका विदेश मन्त्री एन्टोनी जे ब्लिन्केनबीच साढे १२ करोड डलर ऋण लिनेबारे छलफल भएको छ।
सोमबार राति वासिङटन डिसीमा भएको भेटवार्तामा नेपालमा विकास लक्षित लगानी गर्नेअन्तर्गत १२ करोड ५० लाख अमेरिकी डलर (१२५ मिलियन अमेरिकी डलर) को ऋण लिनेबारे छलफल भएको विदेश मन्त्रालयका प्रवक्ता म्याथ्यू मिलरले जारी गरेको विज्ञप्तिमा उल्लेख छ।
उक्त रकम साना तथा मध्यम खालका उद्यमीहरूलाई ऋण दिनेबारे छलफल भएको उक्त विज्ञप्तिमा उल्लेख छ।
भेटवार्तामा विदेश मन्त्री ब्लिन्केनले इसरायलमा हमासको आक्रमणमा परी ज्यान गुमाएका नेपालीहरूप्रति श्रद्धाञ्जली दिए।
गत असोज २० गते हमासले इसरायलमाथि आक्रमण गरेको थियो। आक्रमणमा परेर १० जना नेपाली विद्यार्थीको मृत्यु भएको थियो।
त्यसक्रममा विपिन जोशी बेपत्ता भएका थिए। उनीबारे पनि विदेश मन्त्री ब्लिन्केनले चासो व्यक्त गरेको विज्ञप्तिमा उल्लेख छ।
भेटवार्ताका क्रममा परराष्ट्रमन्त्री साउदले नेपालको विकासका लागि व्यापार तथा लगानी, कृषि, खाद्य सुरक्षा, प्रविधिको विकास तथा विस्तारका बारेमा कुरा राखेका थिए। मन्त्री साउदले नेपालको व्यापार विकासका लागि सहयोग गर्न पनि समकक्षी ब्लिन्केनसँग आग्रह गरेका थिए।
भेटका क्रममा मन्त्री साउदले नेपालको आर्थिक र सामाजिक विकासका लागि अमेरिकी सरकारले गरेको सहयोगकाप्रति आभार व्यक्त गर्दै थप सहयोगका लागि आग्रह गरेका थिए।
एमसिसी अन्तर्गतका परियोजना कार्यान्यवनका लागि दुवै पक्षले प्रतिबद्धता समेत व्यक्त गरेको विज्ञप्तिमा उल्लेख छ।
मन्त्री ब्लिन्केनले लोकतान्त्रिक शासन मजबुद बनाउन नेपालले महत्वपूर्ण भूमिका खेलेको बताउँदै नेपाललाई समृद्ध लोकतान्त्रिक मुलुकका रूपमा देख्न चाहेको बताएका थिए।
उनले नेपालको समग्र विकासका लागि सहयोग गर्न अमेरिका सदैब तयार रहेको पनि बताएका थिए।
भेटघाटका क्रममा उनले ब्लिन्केनलाई नेपाल भ्रमणका निमित्त औपचारिक निम्तो पनि दिएका छन्।
सन् २०१८ पछि पहिलो पटक नेपाली परराष्ट्र मन्त्रीले अमेरिकाको औपचारिक भ्रमण गरेका हुन्। उनी अमेरिकी समकक्षी ब्लिन्केनको निम्तोमा १२ गते अमेरिका प्रस्थान गरेका थिए।
सन् २०१८ को डिसेम्बरमा अमेरिका भ्रमण गरेका तत्कालीन परराष्ट्रमन्त्री प्रदीप ज्ञवालीले समकक्षी माइक पम्पेओलाई भेटेका थिए।
