विवेकशील साझा पार्टी कोशी प्रदेश समितिले तरहरा-धरान सडकखण्ड निर्माण पूरा गर्न मुख्यमन्त्री केदार कार्कीको ध्यानाकर्षण गराएको छ।
कोशी राजमार्गअन्तर्गत तरहरा-धरान खण्डका काम नहुँदा जनताले सास्ती खेप्नुपरेको विवेकशील साझाको भनाइ छ।
पार्टी प्रतिनिधिमण्डलले मुख्यमन्त्री कार्कीलाई भेटेर निर्धारित समयावधि समाप्त भई सक्दा पनि तरहरा-धरान सडकखण्ड निर्माण कार्य पूरा नहुँदा सर्वसाधारणले दुख: झेल्नु परेको भन्दै ध्यानाकर्षण गराएको हो।
प्रदेश अध्यक्ष सुदन श्रेष्ठले बुझाएको ध्यानाकर्षण पत्र बुझ्दै मुख्यमन्त्री कार्कीले सम्बन्धित निकायलाई बोलाएर प्रगति विवरण सार्वजनिक गर्ने बताए।
पार्टीका केन्द्रीय उपाध्यक्ष प्रकाशचन्द्र परियार, प्रदेश अध्यक्ष श्रेष्ठ, केन्द्रीय सदस्य वीरेन्द्र गुप्ता, प्रदेश उपाध्यक्ष हेमन्त भट्टराई, सचिव चिरञ्जीवी रेग्मी, सदस्य भुवन थापालगायतले मुख्यमन्त्रीलाई भेटेर सडक निर्माण छिटो पूरा गर्न ध्यानाकर्षण गराएका हुन्।
साथै पार्टीले प्रकाशन गरेको नेपालको सांस्कृतिक मानचित्र उपाध्यक्ष परियारले मुख्यमन्त्री कार्कीलाई हस्तान्तरण गरेका थिए।
मानचित्र ग्रहण गर्दै मुख्यमन्त्री कार्कीले ऐतिहासिक नेपालको गौरवमय इतिहास झल्काउने साँस्कृतिक मानचित्र आफ्नो कार्यालयमा राखेर प्रचार-प्रसारमा सहयोग गर्ने बताए।
