चाडबाडको मौका पारेर प्रत्येक वर्ष चियापान गर्दै आएको नेकपा एमालेले यसपालि निम्तालुहरूलाई केरा, लड्डु, निम्की र कटलेट खुवाउने भएको छ।
बुधबार मध्याह्न साढे १२ बजेदेखि विभिन्न चरणमा निम्तालुहरू बोलाएको प्रमुख प्रतिपक्षी दल एमालेले खानेकुराका लागि यसरी व्यवस्थापन गरेको हो।
एउटा बोताको एक सय रुपैयाँ पर्ने यही मेनु कार्यकर्ता र सर्वसाधारणका लागि मात्रै हो। विशिष्ट श्रेणीका पाहुनाहरूका लागि भने छुट्टै मेनु रहेको पोलिटब्युरो सदस्य विनोद श्रेष्ठले जानकारी दिए।
पार्टी कार्यालय च्यासलमा सुरू भएको चियापानमा एमालेले सर्वसाधारण र कार्यकर्तालाई साढे १२ बजे बोलाएको छ।
चियापानमा प्रधानमन्त्री, मन्त्रीहरू, सांसदहरू, क्रियाशील राजनीतिक दलका प्रमुख, नेताहरू, संवैधानिक निकायका प्रमुखहरू, राजदूत, सुरक्षा निकायका प्रमुख तथा अधिकारीहरू लगायतलाई आमन्त्रण गरिएको छ।
दसैं, तिहार, नेपाल संवत्, छठ, इद, ल्होसार आदि पर्वका अवसरमा राजनीतिक दलहरूले बर्सेनि चियापान आयोजना गरेर शुभकामना साटासाट गर्ने गर्छन्।
