नेकपा एमालेले फागुन १ गतेलाई जनयुद्ध दिवस मनाउने प्रस्ताव संसदमा पेस गर्न सरकारलाई चुनौती दिएको छ।
प्रतिनिधिसभाको बिहिबारको बैठकलाई सम्बोधन गर्दै एमाले उपाध्यक्ष विष्णु पौडेलले जनयुद्ध दिवस मनाउने निर्णय गरेर गठबन्धन बनेको र कांग्रेस पनि त्यसैमा सहभागी भएको टिप्पणी गरे।
‘हिंसा सुरू भएको दिनलाई जनयुद्ध दिवस मानेर विदा दिने निर्णय सरकारबाट भएको छ, कांग्रेस त्यसैमा सहभागी छ,’ पौडेलले भने, ‘यदि यो सरकारसँग आँट छ भने जनयुद्ध दिवस मनाउने प्रस्ताव संसदमा लिएर आओस् त्यसको निर्णय जनप्रतिनिधिले गर्छन्,हामीले गर्छौं।’
उनले संसदले गर्ने निर्णय मान्न सरकार तयार हुनुपर्ने बताए।
‘नत्र हिंसा सुरू भएको दिनलाई युद्ध दिवस मनाउने निर्णयबाट सरकार पछि हटोस्,’ उनले भने।
यस्ता निर्णयहरू गरेर नै सरकारले शान्ति प्रक्रिया बिथोल्न खोजेको पोडेलले बताए।
