नेपाली कांग्रेस कोशी प्रदेश संसदीय दल नेताको जिम्मेवारीमा उद्धव थापा नै फर्केका छन्।
सोमबार संसदीय दलको बैठकले उनको राजीनामा अस्वीकार गरेपछि उनी जिम्मेवारीमा फर्केका हुन्।
‘दलको बैठकले मेरो राजीनामा अस्वीकार गरेर जिम्मेवारीमा फर्किन भनेपछि म फर्किएको छु,’ थापाले भने।
असोज २७ मा कांग्रेसबाट विद्रोह गरेर केदार कार्की मुख्यमन्त्री बनेपछि थापाले दलको नेताबाट राजीनामा दिएका थिए।
कांग्रेस प्रदेशका सभापतिसमेत रहेका थापा यसअघि दुईपटक मुख्यमन्त्री बनेका थिए।
पहिलोपटक सभामुखको हस्ताक्षर प्रयोग गरेर मुख्यमन्त्री बनेका उनी सर्वोच्च अदालतबाट पदमुक्त भएका थिए।
दोस्रोपटक मुख्यमन्त्री बन्दा बैठकको अध्यक्षता गर्ने सांसदले समेत विश्वासको मत दिएपछि उनी सोही कारण अदालतबाट दोस्रोपटक पदमुक्त बनेका थिए। त्यसपछि संविधानको धारा १६८ को उपधारा ३ अनुसार सबैभन्दा ठूलो दल एमालेका नेता हिक्मत कार्की मुख्यमन्त्री बनेका थिए। उनले पनि असोज २० मा राजीनामा दिएपछि अहिले केदार कार्की संविधानको धारा १६८ को उपधारा ५ अनुसार मुख्यमन्त्री बनेका छन्।
--1715160207.JPG)
