नेपाली कांग्रेसका महामन्त्री विश्वप्रकाश शर्माले बाँकेका योगराज ढकाल रिगलको आममाफी प्रकरणको जिम्मेवारी कसले लिने हो भन्दै प्रश्न गरेका छन्।
रिगललाई सरकारको सिफारिसमा राष्ट्रपतिले कैद मिनाहा गरिदिएका थिए। तर सर्वोच्च अदालतले कैद मिनाहा बदर गरिदिएपछि रिगल पुन: पक्राउ परी बाँके जिल्ला कारागार चलानसमेत भइसकेका छन्।
यो प्रकरण गम्भीर भए पनि राज्यले केही थाहा नपाएजस्तो गरिरहेको शर्माको भनाइ छ।
‘सर्वोच्चले रिगल प्रकरण गल्ती भयो भनेर फैसला गर्दासमेत कोही पनि आत्मालोचना गरेको देख्दिनँ,’ न्युज एजेन्सी नेपालसँगको कुराकानीमा शर्माले भने, ‘हाम्रो पार्टीका उपसभापति धनराज गुरूङ कानून मन्त्री हुनुहुन्छ। अर्का उपसभापति पार्टीबाट नेतृत्व गरेर सरकारमा उपप्रधान तथा रक्षामन्त्री हुनुहुन्छ। कसैले जिम्मेवारी लिनुपर्दैन?’
प्रधानमन्त्री वा अरू कोहीले यो प्रकरणको नैतिक जिम्मेवारी लिनुपर्नेमा त्यसो नभएको शर्माले बताए।
‘राष्ट्रपतिको कार्यालयले पनि कस्ता-कस्ता सिफारिस आएका छन् हेर्नुपर्दैन?,’ उनको प्रश्न छ, ‘यो घटनामा कसै न कसैले जिम्मेवारी लिएर राजीनामा आउनुपर्दथ्यो।’
चेतन मानन्धरको हत्या प्रकरणमा रिगलले जन्मकैदको सजाय पाएका थिए। रिगलमाथि २०७२ साल असार २८ गते नेपालगञ्जको धम्बोजी चोकमा चेतन मानन्धरमाथि खुँडा प्रहार गरी हत्या गरेको अभियोग थियो।
गत कार्तिक १६ गते न्यायाधीशहरु ईश्वरप्रसाद खतिवडा, सपना प्रधान मल्ल र कुमार चुडालको इजलासले संविधान दिवसमा सरकारको सिफारिसमा राष्ट्रपतिले गरेको कैद सजाय मिनाहा गर्ने निर्णय बदर गर्ने आदेश दिएका थिए।
इजलासले रिगललाई बाँकी कैद माफी दिने निर्णय ‘अपराध पीडितको हक प्रतिकूल देखिएको’ जनाएको छ। रिगललाई १ वर्ष ११ महिना ५ दिन बाँकी कैद मिनाहाका लागि पुन: कारागार पठाइएको थियो।
भिडिओ:
