प्रतिनिधि सभाका सांसदहरूले अनिवार्य रूपमा विद्युतीय हाजिरी गर्नुपर्ने भएको छ।
संसद सचिवालयले यसअघि सांसदहरूले हाजिरी पुस्तिका र विद्युतीय हाजिरीमध्ये कुनै एकमा हाजिर गरे हुने व्यवस्था मिलाउँदै आएको थियो। माघ २२ गतेदेखि सुरू हुने अधिवेशनबाट भने अनिवार्य रूपमा विद्युतीय हाजिरीको व्यवस्था गर्न लागिएको संसद सचिवालयले जनाएको छ।
'हामीले सांसदहरूलाई विद्युतीय हाजिरीको अनिवार्य व्यवस्था गर्ने तयारी गरेका छौं,' संघीय संसदका कार्यवाहक महासचिव पद्मप्रसाद पाण्डेयले भने, 'संसद राजनीतिक थलो पनि भएकाले सभामुख र दलका प्रमुख सचेतकहरूसँग छलफल गरेर टुङ्गोमा पुग्छौं।'
हाजिरीका लागि बानेश्वरस्थित संसद भवनमा रहेको प्रतिनिधि सभाको बैठक कक्ष बाहिर दुई ठाउँमा दुई दुई वटा गरी ४ वटा हाजिरी मेसिन राखिने भएको छ। तर सभामुख, प्रधानमन्त्री, विपक्षी दलको नेता, कांग्रेस सभापति शेरबहादुर देउवाले भने आफ्नै कार्यकक्षबाट हाजिरी गर्न सक्नेछन्। उनीहरूको कार्यकक्षमै हाजिरी मेसिन राखिएको छ।
राष्ट्रिय सभामा भने यसअघि नै विद्युतीय हाजिरीको व्यवस्था हुँदै आएको छ। राष्ट्रिय सभाले बैठकमा उपस्थित सांसदहरूको विवरण समेत वेबसाइटमा राख्ने गरेको छ। आफ्नो वैयक्तिक र जैविक विवरण दुरूपयोग हुन सक्ने भन्दै राष्ट्रपतिबाट मनोनीत सांसद वामदेव गौतमले लामो समयसम्म आफ्नो औंठा छाप र अनुहार प्रविष्ट गर्न मानेका थिएनन्।
राष्ट्रिय सभामा विद्युतीय हाजिरी गर्दैनन् वामदेव गौतम
गौतमले सहमति दिएपछि राष्ट्रिय सभामा विद्युतीय हाजिरी हुँदै आएको छ।
प्रतिनिधि सभाका २७५ सांसदमध्ये २७३ जनाकै औंठा छाप र अनुहारको विवरण सचिवालयले संकलन गरिसकेको छ। केही समयअघि मात्र निलम्बन फुकुवामा परेका सांसद लक्ष्मी महतो कोइरीले पनि संसद सचिवालयमा आएर आफ्नो विवरण दिएका थिए।
भ्रष्टाचार मुद्दामा निलम्बनमा रहेका कांग्रेस सांसद टेकबहादुर गुरूङ र जेलमा रहेका अर्का सांसद टोपबहादुर रायमाझीको विवरण संकलन गर्न बाँकी छ। निलम्बनमा परेका सांसदहरूले हाजिरी गर्न, बैठकमा भाग लिन पाउँदैनन्।
संसद बैठकमा सांसदहरू हाजिर गरेर बाहिर जाने गरेका कारण कतिपय अवस्थामा बैठकका लागि आवश्यक सांसदको संख्या पुग्दैन। संसदमा कुनै पनि प्रस्ताव निर्णयार्थ पेश गर्न एक चौथाई सांसद आवश्यक हुन्छ। सांसद हाजिर गरेर बाहिर जाने गरेकोमा कतिपय सांसदहरू समेत असन्तुष्ट छन्।
राष्ट्रिय स्वतन्त्र पार्टीका सांसद हरि ढकालले बैठकअघि र बैठकपछि दुई पटक हाजिरीको व्यवस्था गर्न संसदमै माग गरेका थिए।
संसद बैठक सकिएपछि पनि हाजिर गर्ने व्यवस्था गरौंः सांसद ढकाल (भिडिओ)
सभामुख देवराज घिमिरेले सांसदहरू तलब भत्ता मात्र खान संसदमा आउँछन् भन्ने नराम्रो सन्देश गएको उल्लेख गर्दै प्रतिनिधि सभामा विद्युतीय हाजिरीको व्यवस्था अघि बढाएका थिए।
तलब-भत्ता खानमात्र सांसद बैठकमा आउँछन् भन्ने छ, इ-हाजिरी सुरू गरौं: सभामुख घिमिरे
सभामुखले विद्युतीय हाजिरी अघि बढाउने निर्णय गरेपछि संसद सचिवालयले गत जेठमा सबै सांसदहरूको औंठा छाप र अनुहारको विवरण संकलन गरेको थयो।
विद्युतीय हाजिरीका लागि लिन थालियो सांसदको बायोमेट्रिक
संसद सचिवालयका अनुसार विद्युतीय हाजिरीको व्यवस्था गरेपछि एकैदिन दुई बैठक बसेको अवस्थामा सांसदहरूले दुई पटक हाजिर गर्नुपर्छ। सांसदहरूले संसद बैठकमा सहभागी भएको दिन बैठक भत्ता १ हजार र सवारी साधन भत्ता १ हजार पाउँछन्।
