प्रतिपक्षी दल राष्ट्रिय स्वतन्त्र पार्टी (रास्वपा) ले मेलम्ची खानेपानी आयोजनाको मुहान क्षेत्र अम्बाथानसम्म दबाब यात्रा गर्न लागेको छ।
मेलम्ची परियोजनाको दीर्घकालीन हितमा काम नगरी अस्थायी तवरले पानी पथान्तरण गर्ने सोच राखिएको र आयोजना समयमा पूरा नभएको भन्दै रास्वपाले दबाब यात्रा गर्न लागेको हो।
आइतबार बिहान १० बजे मेलम्ची नगरपालिका—११ स्थित परियोजनाको कार्यालयबाट दबाब यात्रा सुरू हुने रास्वपाले बताएको छ।
दबाब यात्राको नेतृत्व सांसद सोबिता गौतमले गर्नेछिन्। उनलाई पार्टी सभापति रवि लामिछानेले ब्यानर हस्तान्तरण गरेर दबाब यात्राको सुरूआत हुने र यात्रा करिब २४ किलोमिटर हुने रास्वपाले बताएको छ।
रूग्ण र अलपत्र पारिएका विकास योजनाको काम अगाडि बढाउन सरकारको ध्यानाकर्षण गराउने उद्देश्यका साथ रास्वपाले ‘राष्ट्रव्यापी दबाब अभियान’ सुरू गरेको रास्वपाले जनाएको छ।
पहिलो चरणअन्तर्गत् माघ २१ देखि चैत २१ सम्म प्रत्येक प्रदेशका तीन—तीनवटा योजनामा दबाब यात्रा गरिने रास्वपाले बताएको छ।
रास्वपाले यसअघि पुस ९ देखि ११ गतेसम्म नारायणगढ—बुटवल ११३ किलोमिटर सडक खण्डमा दबाब यात्रा गरेको थियो।
