नेकपा एमालेका सांसद पदम गिरीले सरकार संवेदनशील नबने जनताको आक्रोश वायु बनेर आउने चेतावनी दिएका छन्।
एमालेका प्रमुख सचेतकसमेत रहेका गिरीले बुधबारको प्रतिनिधि सभा बैठकमा रूसी सेनामा भर्ती भएकाहरूलाई नेपाल फर्काउने, विपिन जोशीलाई हमासको नियन्त्रणबाट छुटाउने, देशभित्र रोजगारी सिर्जना गर्ने, विकासनिर्माणका कामलाई गति दिने लगायका कामहरूमा सरकार संवेदनशील नबनेको बताएका हुन्।
‘सरकार संवेदनशील बनोस् होइन भने जनताको आक्रोश वायु बनेर आउन सक्छ, जुन सरकारको निम्ति धेरै महँगो पर्नसक्छ । ख्याल गरोस्,’ उनले भने।
गिरीले रूसी सेनामा भएका युवाहरू फर्काउनु त परको कुरा मृत्यु भएकहरूको शव पनि ल्याउन नसकेको बताए।
‘यस्तो पनि सरकार हुन्छ? विपिन जोशीलाई नेपाल ल्याउन किन भूमिका खेल्न सकेन,’ उनले भने।
उनले विकास निर्माणका कुनैपनि क्षेत्रमा सरकारले इमान्दारिताका साथ काम नगरेको बताएका छन्। पोखरा विमानस्थल, भैरहवा विमानस्थल अरबौं खर्चेर बनाए पनि सञ्चालन गर्न सरकारले पहलकदमी नलिएको उनले बताए।
‘निरन्तर ऋण बढेको बढ्यै छ। उत्तर दक्षिणतिर फर्केर छिमेकीहरूले के भन्छन् भन्ने आधारमा आयोजनालाई अलपत्र राख्न पाइन्छ?,’ उनले भने।
संविधानको रक्षा गर्नुपर्ने प्रधानमन्त्रीले जातीय राज्य दिन्छु भनेर प्रधानमन्त्री प्रचण्ड पपुलिस्ट स्टन्टबाजमा रमाउनुपर्ने स्थिति बनेको सांसद गिरीले बताए।
‘वर्तामान सरकारकै कारण हाम्रो समाज जातीय, धार्मिक र अनेक हिसाबमा विभाजित बन्ने र देश अर्को द्वन्द्वमा फस्ने स्थिति सिर्जना भइराखेको छ,’ उनले भने।
उनले प्रधानमन्त्रीसँगै मन्त्रीहरू पनि स्टन्टमै रमाएको बताए।
-1707287890.jpg)
