नेकपा एमालेका सांसद पदम गिरीले कार्यतालिका बनाउँदैमा संसद व्यवस्थित रूपमा चल्छ भन्ने निश्चित नहुने बताएका छन्।
प्रतिनिधि सभाको बुधबार बसेको बैठकमा एमाले संसदीय दलका प्रमुख सचेतकसमेत रहेका गिरीले संसदलाई प्रभावकारी ढंगले अगाडि बढाउन सरकारले बिजनेस दिनुपर्ने बताएका हुन्।
‘कार्यतालिका बनाउँदैमा संसद व्यवस्थित रूपमा अगाडि बढ्छ भन्ने हुँदैन। संसदका बैठक प्रभावकारी हुन्छन् भन्ने होइन,’ उनले भने, ‘यसमा सरकारले सहयोग गर्नुपर्छ। संसदमा शून्य समय र विशेष समयका लागि मात्रै बैठक आयोजना गर्ने, समयमा विधेयकहरू नदिने, बिजनेस नदिने हो भने त्यो कार्यतालिकाले मात्रे केही हुनेवाला छैन।’
त्यसकारण सरकार संसदलाई प्रभाकारी बनाउने कुरामा जिम्मेवार हुनुपर्ने उनले बताए।
संघीय संसद सचिवालयले यसपालिदेखि बैठक सञ्चालनका लागि संसदीय क्यालेन्डर बनाएको छ। सो अनुसार बैठक सञ्चालन गर्ने प्रतिनिधि र राष्ट्रिय सभाले पहिलो पटक संसद बैठक सञ्चालन गर्ने दुई महिनाको क्यालेन्डर तयार पारेका छन्।
संसद सचिवालयले तयार पारेको क्यालेन्डर अनुसार अब सातामा ३ दिनमात्र संसद बैठक सञ्चालन हुनेछ।
बाँकी ३ दिनमा सांसदहरूले संसदीय समिति वा निर्वाचन क्षेत्रमा गएर काम गर्न सक्नेछन्।
-1707287889.jpg)
