नेपाली कांग्रेस काठमाडौं जिल्ला कार्यसमितिले शुक्रबार गरेको सम्मेलन उद्घाटनमा सभापति शेरबहादुर देउवासहित पदाधिकारीहरू पुगे।
सम्मेलनमा जिल्लादेखि केन्द्रीय सदस्य र पदाधिकारीहरूले धारणा राखेका थिए। मञ्चमा बसेर सबैका धारणा सुनेका सभापति देउवाको बोल्ने पालो आयो।
उनले नेताहरूले लामो समय भाषण गर्ने गरेकोमा असन्तुष्टि जनाए। सम्मेलनमा अधिकांश वक्ताले जिल्ला सभापति कृष्ण बानियाँ (सबुज) लाई टिकट नदिइएको भन्दै सभापति देउवालाई लक्षित गर्दै आलोचना गरेका थिए।
सभापति देउवाअघि बोलेका महामन्त्री गगन थापा र केन्द्रीय सदस्य प्रदीप पौडेलले जिल्ला सभापति बानियाँलाई प्रतिनिधि सभा वा राष्ट्रिय सभा चुनावका बेला टिकट दिन नसकिएकोमा 'क्षमा' नै मागेका थिए। गत माघ ११ गते भएको राष्ट्रिय सभा चुनावका बेला पनि बानियाँ टिकटका आकांक्षी थिए।
तर कांग्रेसले बागमतीमा जितजंग बस्नेत र विष्णुदेवी पुडासैनीलाई उम्मेदवार बनाएको थियो। उनीहरू निर्वाचितसमेत भएका थिए।
सम्मेलनमा सभापति देउवाले भाषण लामो समय नगर्न आग्रह नै गरे।
‘मान्छे बोल्दाबोल्दा हल नै खाली भइसक्या हुन्छ, माइक लिने एक जना बसेको हुन्छ,’ देउवाले भने, ‘कुरो के भने- हाम्रा साथीहरूको पनि सबैलाई लामो समय बोल्नुपर्नेछ। पूरा कुरा सुनाउनै पर्यो के गर्ने। कहिलेकाहीँ भित्तालाई पनि सुनाउनुपर्ने हुन्छ, केही छैन त्यो।’
काठमाडौं सभापति बानियाँलाई टिकट नदिएको विषयमा चित्त दुखाएकोबारे पनि देउवाले कुरा राखे।
‘यहाँ एउटा कुरा सबैलाई चित्त दुखेछ, बानियाँलाई टिकट दिएन भनेर क्या!,’ देउवाले हाँस्दै भने, ‘कुरा सुन्नुस् है, अब टिकट पायो भने जिताउनुहोला है।’
देउवाले यसो भन्दा कार्यकर्ताले हुटिङ गरेका थिए।
‘उहाँ (बानियाँ) ले टिकट पाउँदा हराउनुभयो भने नि! कि जिताउन सकिँदैन भनेर तपाईंहरूले राष्ट्रिय सभा भन्नु भएको जस्तो छ है, विचार गर्नुस्,’ देउवाले हुटिङ गर्ने कार्यकर्ताहरूलाई प्रश्न गरे, ‘उहाँलाई जिताएर छाड्नुस् तपाईंहरूलाई म धन्यवाद दिनेछु।’
सभापति देउवाले काठमाडौं संघीय राजधानी भएकोले पनि यहाँ राम्रो निर्णय गर्दै पार्टीले काम गर्नुपर्ने बताएका थिए।
यो पनि: भ्रष्टचारी, ठग र अराजक भिआइपी हुँदैन, पाता कसेर लैजानुपर्छ: गगन थापा
