कोशी प्रदेशका मुख्यमन्त्री केदार कार्कीले शुक्रबार मन्त्रिपरिषद विस्तार गरेका छन्। प्रदेशमा चार जना मन्त्री र दुई जना राज्यमन्त्री थपिएका छन्।
योसँगै प्रदेश मन्त्रिपरिषद सदस्यको संख्या १० पुगेको छ। मन्त्रिपरिषदमा अब कांग्रेसबाट मुख्यमन्त्रीसहित तीन मन्त्री र दुई राज्यमन्त्री, माओवादीबाट तीन मन्त्री र एकीकृत समाजवादीबाट एक जना मन्त्रीको प्रतिनिधित्व रहनेछ। गठबन्धनकै जसपा अहिलेसम्म मन्त्रिमण्डलमा सहभागी छैन।
यसअघि मुख्यमन्त्री कार्की, भौतिक पूर्वाधार मन्त्री कमल जवेगु (नेकपा एस), वन तथा पर्यटन मन्त्री गणेश उप्रेती (माओवादी केन्द्र) र आन्तरिक मामिलामन्त्री शमसेर राई (कांग्रेस) मन्त्री थिए।
प्रदेश मन्त्रिपरिषद विस्तारका क्रममा मुख्यमन्त्री कार्कीले नेपाली कांग्रेसबाट दुई जना मन्त्री र दुई जना राज्यमन्त्री नियुक्त गरेका छन्।
यसक्रममा कार्कीले आफू मुख्यमन्त्री बन्दा पार्टी निर्णयविरूद्ध विद्रोह गरेर हस्ताक्षर गर्नेहरूलाई प्राथमिकता दिएका छन्। विस्तारित मन्त्रिपरिषदमा कांग्रेस संस्थापन पक्षका प्रदीप सुनुवार स्वास्थ्यमन्त्री बनेका छन्। शेखर कोइराला पक्षका रामकुमार खत्री उद्योग, कृषि तथा सहकारी मन्त्री बनेका छन्।
शेखर समूहकै इन्दिरा थापा आर्थिक मामिला राज्यमन्त्री र सुनिताकुमारी गुरुङ आन्तरिक मामिला राज्यमन्त्री बनेका छन्। आर्थिक मामिला मन्त्रालय मुख्यमन्त्री आफैंले राखेर इन्दिरा थापालाई राज्यमन्त्री बनाएका हुन्।
नेकपा माओवादी केन्द्रबाट थप दुई जना मन्त्री नियुक्त भएका छन्। राजेन्द्र कार्की सामाजिक विकास मन्त्री नियुक्त हुँदा नारायणबहादुर मगर खानेपानी तथा सिँचाइ मन्त्री नियुक्त भएका छन्।
शुक्रबार नवनियुक्त मन्त्रीहरूलाई प्रदेश प्रमुख पर्शुराम खापुङले सपथ समेत गराएका छन्।
एमालेको सहयोगमा कांग्रेसका ८ सांसदको हस्ताक्षरबाट असोज २७ गते मुख्यमन्त्री नियुक्त भएका कार्कीले असोज २८ गते सपथ लिएका थिए ।
कार्कीले मंसिर १७ गते सरकारमा नेकपा माओवादी केन्द्रका गणेश उप्रेती र एकीकृत समाजवादीका कमल जबेगूलाई मन्त्री नियुक्त गरेपछि एमालेका राम राना मगरले राजीनामा दिएर बाहिरिएका थिए।
