पाकिस्तानमा पूर्वप्रधानमन्त्री इमरान खानका उम्मेदवारहरू प्रतिस्पर्धीमध्ये सबैभन्दा अगाडि छन्।
शुक्रबार आएको पछिल्लो मतपरिणामअनुसार खानको पार्टी पाकिस्तान तेहरिक-इ-इनसाफ (पिटिआई) का उम्मेदवारहरूले अन्य पार्टीलाई पछि पारेका हुन्।
अल्जजिराका अनुसार १४६ सिटको मतपरिणाम भएको छ। जसमध्ये पिटिआई समर्थित स्वतन्त्र उम्मेदवारहरूले अग्रता कायम गरेका छन्।
पिटिआई समर्थितसहित स्वतन्त्र उम्मेदवारहरूले मात्रै ६० ठाउँ जितेका छन्।
दोस्रो स्थानमा सत्तारूढ पाकिस्तान मुस्लिम लिग (पिएमएल-एन) ले जम्मा ४३ सिट जितेको छ। तेस्रो स्थानमा पाकिस्तान पिपुल्स पार्टी (पिपिपी) ले ३७ सिट जितेको छ। अन्य दलले ६ सिटमात्रै जितेको छ।
यहाँ ११९ सिटको मतगणना जारी छ।
पिटिआईका अध्यक्ष समेत रहेका इमरान खान हाल रावलपिण्डीस्थित अडियाला जेलमा छन्। चुनाव सुरू हुनु केही समयअघि विभिन्न अदालतले उनलाई पटकपटक जेल सजाय सुनाएको थियो।
उनले गैरइस्लामिक विवाह गरेको भन्दै गत शनिबार एक अदालतले उनलाई सात वर्ष जेल सजाय सुनाएको थियो। त्यसअघि उनलाई नेसनल अकाउन्टाबिलिटी ब्युरो (एनएबी) ले राज्यको उपहार बेचेको आरोपमा १४ वर्ष जेल सजाय सुनाएको थियो। यी दुई मुद्दामा उनकी श्रीमती बुशरा बिबीसहितलाई जेल सजाय सुनाएको हो।
त्यसअघि साइफर मुद्दा अर्थात सरकारी गोप्य सूचना चुहाएको भन्दै १० वर्ष जेल समेत सुनाएको थियो।
