नेपाली कांग्रेसले फागुन ७ देखि १० गतेसम्म ललितपुरको गोदावरीमा महासमिति बैठक गर्ने भएको छ।
महासमितिमा उपसभापति पूर्णबहादुर खड्काले नीति, महामन्त्रीद्वय गगन थापाले संगठन र विश्वप्रकाश शर्माले समसामयिक राजनीतिक प्रस्ताव पेश गर्नेछन्।
बैठकमा महासमिति सदस्यहरूले पनि विभिन्न एजेन्डामाथि छलफल हुनुपर्ने गरी प्रस्ताव राख्ने तयारी गरिरहेका छन्।
यो पनि: महासमिति बैठकमा छिर्न कांग्रेस प्रतिनिधिले बुझाउनुपर्छ तीन हजार रुपैयाँ
केन्द्रीय सदस्य नैनसिंह महरले जनसम्पर्क समितिका पदाधिकारीहरूसँग छलफल गरेका छन्।
महरले पार्टीका जनसम्पर्क समितिका पदाधिकारीसँग भर्चुअल संवाद गरेका हुन्।
महासमिति बैठकमा प्रवासमा रहेका नेपालीका विचार समेट्न महरले संवाद गरेका हुन्।
जनसम्पर्क समितिका समस्या, पार्टीसँगका अपेक्षा, पार्टीले चाल्नुपर्ने कदम र नेपालमा लगानीको वातावरण निर्माण लगायतका विषयमा उनीहरूले कुरा राखेका छन्।
नेपाल जनसम्पर्क समिति अमेरिकाका सभापति आनन्द विष्ट, क्यानडाका सभापति प्रदीपप्रकाश ओली, नेदरल्याण्डका सालिक गौतम, बहराइनका पद्यमसुन्दर गुरुङ लगायत ३५ जनाले विभिन्न सुझाव दिए।
जनसम्पर्क समितिका सभापतिहरूले नेपालमा लगानी गर्न चाहेको र लगानीको सुरक्षाको प्रत्याभूति सरकारले गर्नुपर्ने बताए। कांग्रेस र देशका लागि आफूहरूले योगदान गरिरहेको भए पनि देशले माया नगरेको अनुभूति भइरहेको उनीहरूको गुनासो थियो।
संवादका क्रममा उनीहरूले आफ्नो दोहोरो नागरिकता अलि बलियो हुनुपर्ने बताएका थिए। नागरिकतामा आफूहरूका अधिकार कम भएको गुनासो उनीहरूको थियो। नेपालको सम्पत्ति भोगचलनका सन्दर्भमा पनि नागरिकतामा धेरै कुरा अटाउन नसकेको उनीको भनाइ थियो।
विदेशबाटै मतदान गर्न पाउने व्यवस्थाका विषयमा कांग्रेसले नीतिमै स्पष्टरूपमा ल्याउनुपर्ने उनीहरुको जोड रहेको थियो।
महरले महासमिति बैठकमा यी विषय प्राथमिकताका साथ उठाइने बताए।
‘विश्वमा छरिएर रहेका नेपालीको योगदानबिना देश बन्न गाह्रो छ। त्यसैले मुलुकको समृद्धिका लागि उहाँहरूको साथ र सहयोगको खाँचो छ। विश्वमा छरिएर रहेका नेपालीहरूको सिप, ज्ञान, प्रविधि, क्षमता र लगानीलाई नेपालको पक्षमा सदुपयोग हुने गरी काम गर्नुपर्छ। यो विषय म महासमिति बैठकमा उठाउँछु,’ महरले भने।
यस्तै नेता भूपेन्द्रजंग शाहीले पनि विभिन्न एजेन्डा महासमितिमा राख्ने तयारी गरेको बताए। आफूले देशका विभिन्न क्षेत्रका कार्यकर्ता तथा नागरिकहरूसँग गरेका कुराकानी र प्राप्त सुझावका आधारमा एजेन्डा तय गरेको र ती एजेन्डा पार्टीकै प्रस्तावमा समेट्न जोड गर्ने उनले बताए।
‘पार्टी महासमिति बैठकका लागि १५ बुँदे प्रस्ताव तयार पारेको छु,’ उनले भने, ‘यो एजेन्डा पार्टीमा बहसमा लैजाने हो। मैले पार्टीका विभिन्न क्षेत्रका महासमिति सदस्यसँग पनि यसबारे सुझाव लिएको छु।’ पुरक एजेन्डा केन्द्रीय कार्यालयमा दर्ता गराउने उनले बताए।
पार्टीले हाम्रा एजेन्डालाई समेटेन भने महासमितिमा आफैंले एजेन्डा पेश गर्ने उनले बताए।
कामका आधारमा कार्यकर्ताको मूल्याङ्कन हुनुपर्ने विषय आफूले उठाएको उनले बताए। ‘गुटका आधारमा होइन कति काम गरेको छ त्यसका आधारमा मूल्याङ्कन गर्ने व्यवस्था गरौं, जिम्मेवारी दिँदा पनि क्षमताका आधारमा दिऔं,’ उनले भने, ‘कसैलाई काखा र कसैलाई पाखा नगरौं भन्ने हो।’
साथै पञ्चायतकालदेखि अहिलेसम्म सार्वजनिक पदमा बसेका नेतादेखि कर्मचारीसम्मका सम्पत्ति छानबिनका लागि एक आयोग गठन गर्नुपर्ने उनको प्रस्ताव छ।
निर्वाचन प्रणालीमा पनि परिवर्तन गर्न आवश्यक रहेको उनी बताउँछन्। ‘प्रतिनिधि सभा सबै सिट प्रत्यक्ष गरौं र समानुपातिक हटाऔं,’ उनले भने, ‘राष्ट्रिय सभा समावेशी समानुपातिक गरौं।’
जनताबाट प्रत्यक्ष निर्वाचित प्रधानमन्त्री व्यवस्थाका विषयमा पनि छलफल गरिनुपर्ने माग उनको छ। ‘पाँच वर्ष ढुक्कसँग काम गर्न कार्यकारी प्रधानमन्त्री व्यवस्था पो उपयुक्त हो कि!, छलफल गरौं,’ उनले भने।
उनले पार्टीभित्र अवसरको समान वितरण हुनुपर्ने बताए।
‘एकै मानिस सधैं मन्त्री र सांसद हुने? एक जना मानिस तीन पटकभन्दा सांसद हुन नपाउने व्यवस्था गरौं। सीमित मानिसको हालीमुहाली हुन रोकौं,’ उनले भने, ‘प्रधानमन्त्री र मन्त्री पनि दुई पटकमात्रै हुन पाउने व्यवस्था गरौं।’
धर्मका नाममा राजनीतिक गर्न नहुने र धार्मिक विवादमा कांग्रेस विवादमा पर्न नहुने उनले बताए।
युवा विदेश पलायन र रोजगारी अभावका विषयमा पार्टीले गम्भीर छलफल गर्नुपर्ने उनले बताए। ‘कांग्रेस सरकारमा छ, त्यसैले रोजगारीको सिर्जना गरौं र युवालाई स्वदेशमै बस्ने वातावरण बनाऔं,’ उनले भने।
पार्टी संगठन ढाँचा पनि केही परिवर्तन गर्नुपर्ने उनले बताए। निर्वाचनलाई असर नगर्ने गरी त्यसअघि नै महाधिवेशन सक्ने गरी विधानमै व्यवस्था गरिनुपर्ने उनले बताए। ‘आमचुनावको दुई वर्षअघि नै महाधिवेशन अनिवार्य गरिसक्ने कुरा विधानमै लेख्नुपर्छ,’ उनले भने।
पार्टी वडा अधिवेशन दुई वर्षको अन्तरालमा गर्दा नेतृत्व विकास हुने उनको प्रस्ताव छ। ‘महाधिवेशनका बेला मात्रै प्रतिनिधि छान्ने बनाउने र वडालाई चलायमान र नेतृत्व विकास गर्ने ठाउँ बनाउनुपर्छ। यसले पार्टी थप क्रियाशील हुन्छ,’ उनले भने।
पार्टीलाई नागरिककेन्द्रित पार्टी बनाउनुपर्ने उनले बताए। ‘पार्टी सत्ताकेन्द्रित हुनु भएन। नागरिकका सवालमा खरो ढंगबाट अघि बढ्नुपर्छ,’ उनले भने, ‘नागरिकता लिनेदेखि कर बुझाउनसम्म लाइन बस्नुपर्छ। यो अवस्थाको अन्त्य गर्न पहल गर्नुपर्छ।’
यो पनि:
नागरिकका गुनासा सुन्दै टिप्दै कांग्रेसका नेताहरू
कांग्रेसमा बहस- यति धेरै युवा किन विदेशिए?
