नेपाली कांग्रेसका नेता शेखर कोइरालाले संक्रमणकालीन न्यायलाई राजनीतिक लेनदेनको मुद्दा बनाइनु नहुने बताएका छन्।
काठमाडौंमा मंगलबार मानव अधिकार रक्षकहरुको सम्मेलनमा बोल्दै उनले संक्रमणकालीन न्यायको विषय गम्भीर भएकाले राजनीतिक मुद्दा बनाउन नहुने बताए।
सर्वोच्च अदालत, मानव अधिकार आयोगका निर्देशनलाई मध्यनजर राखेर संक्रमणकालीन न्यायसँग सम्बन्धित कानुन बनाउनुपर्ने कोइरालाको भनाइ छ।
पीडितलाई मर्का पर्ने गरी संक्रमणकालीन न्यायसँग सम्बन्धित कानुन बनाउन नहुने उनले बताए।
‘हाम्रो लागि लोकतन्त्र आएको छ, नेताहरुको लागि लोकतन्त्र आएको छ। तर जनताको, नागरिकको लागि लोकतन्त्र आएको छैन भन्ने मैले ठहर गरेको छु,’ उनले भने।
लोकतन्त्रमा कानुनी शासन र मानव अधिकार भएन भने लोकतन्त्र नहुने उनले बताए।
‘कानुनी राज्यको त कानूनी शासनको खिल्ली उडाइरहेको छ। मानव अधिकार आयोगका अध्यक्षज्यू यहीँ हुनुहुन्छ, उहाँहरुले दिएका निर्देशन सरकारले पालना गर्नुपर्दैन, गरेको छैन। त्यस्तो अवसथाबाट हामी जाँदैछौं,’ उनले भने।
(न्युज एजेन्सी नेपाल)
