नेकपा (एमाले) ले बागमती सभ्यताको जगेर्नाका लागि भन्दै नागमतीको मुहान, धाप बाँधसम्म यात्रा गर्ने भएको छ।
कार्यक्रमको एमाले काठमाडौं जिल्ला कमिटीले संयोजन गर्न लागेको हो।
पार्टी अध्यक्ष केपी शर्मा ओलीसहितका नेताहरू सहभागी हुने यात्रा आगामी शनिबार बिहान ९ बजे गुह्येश्वरी फाँटबाट सुरू भएर धाप बाँधसम्म पुग्ने एमाले केन्द्रीय सदस्य कृष्ण राईले बताए।
‘झुलाघाट–चिवा भञ्ज्याङ संकल्प यात्राभन्दा अगाडि नै हामीले योजना बनाएका थियौं,’ राईले सेतोपाटीसँग भने, ‘यात्रा बागमती सभ्यताको जगेर्ना, नदी क्षेत्रको सौन्दर्यीकरण र शुद्धीकरण मात्र नभई काठमाडौं क्षेत्र नम्बर ३ को समृद्धिको अभियान पनि हो।’
राईले धाप बाँध पूर्वराष्ट्रपति विद्या भण्डारी अधिकार सम्पन्न बागमती सभ्यता एकीकृत विकास समितिको पहिलो अध्यक्ष भएका बेला परिकल्पना गरिएको योजना भएको उनले बताए।
धाप बाँधलाई व्यवस्थित गर्न सके काठमाडौंको खानेपानीको स्रोत संरक्षण, पानी पुनःभरण लगायत प्रक्रियामा पनि टेवा पुग्ने राईले बताए।
त्यसका अलावा गुह्येश्वरी नजिकै १८८ रोपनी जग्गा विवाद रहेकाले बागमती सौन्दर्यीकरण योजना प्रभावित बनेको राईले बताए। यात्राका क्रममा त्यो समस्या पनि सम्बोधनका लागि पहल गरिने उनले बताए।
‘गोकर्णमा रहेको फोहोर प्रशोधन केन्द्र निर्माण, निकुञ्जका कारण गोकर्ण क्षेत्रमा रोकिएको करिडोर निर्माण सुरू गर्न पनि यात्रा आवश्यक देखियो,’ उनले भने।
