नेपाली कांग्रेसका २२ जना केन्द्रीय सदस्यहरूले सनातन हिन्दु राष्ट्रका पक्षमा पार्टी उभिनुपर्ने भन्दै पुरक प्रस्ताव पेश गरेका छन्।
शुक्रबार केन्द्रीय कार्यसमिति बैठकमा उनीहरूले विशेष पुरक प्रस्ताव भन्दै सनातन हिन्दु राष्ट्रका पक्षमा दृढतापूर्वक उभिन माग गरेका हुन्।
शंकर भण्डारी, देवेन्द्रराज कँडेल, प्रकाश रसाइली स्नेही, रंगमती शाही, विद्या तिमिल्सिना, गेहेन्द्र गिरी, सीता देवकोटा, अर्जुनजंगबहादुर सिंह, शुक्रराज शर्मा, पुष्प भुसाल, शारदा पौडेल, नागिना यादव, नृपबहादुर बड, सञ्जय गौतम, भीम पराजुली, दिनेश कोइराला, मुक्ताकुमारी यादव, डिला संग्रौलासहितले पुरक प्रस्ताव पेश गरेका छन्।
यो पनि: कांग्रेस महासमिति बैठक परिसरमा हिन्दु राष्ट्रका लागि हस्ताक्षर संकलन
‘कांग्रेस धर्म निरपेक्षताको पक्षमा उभिएकोप्रति गम्भीर बन्दै महासमिति सदस्यहरूले यसको विषक्षमा वैदिक सनातन हिन्दुराष्ट्र नेपाल कायम गर्न त्रिवेणीधाममा भएको महासमितिमा व्यापक हस्ताक्षरसहित माग राखेको र काठमाडौंमा भएको महासमितिमा हस्ताक्षरसहित प्रस्ताव पेश गरेको तथ्यलाई स्मरण गराउँदै फागुन ७ देखि हुने महासमितिमा पेश हुने राजनीतिक दस्तावेजमा वैदिक सनातन धर्मजस्तो बहुमत सदस्यको भावना र आम नेपाली जनताको व्यापक चासो र चिन्ताको विषयलाई छलफलमा नल्याइएकोप्रति चिन्तित हुँदै सनातन हिन्दुराष्ट्रको पक्षमा दृढतापूर्वक उभिन पुरक प्रस्ताव पेश गरेका छौं,’ प्रस्तावमा भनिएको छ।
कांग्रेसमा यसअघि पनि सनातन हिन्दुराष्ट्रका पक्षमा उभिन माग भए पनि पार्टीले औपचारिक रूपमा छलफल गरेको थिएन।
केन्द्रीय सदस्य भण्डारीको नेतृत्वमा सनातन हिन्दुराष्ट्र नेपाल महाअभियानका नाममा पछिल्लो समय विभिन्न गतिविधिहरू भइरहेका छन्।
के छ महामन्त्री गगन थापाको सांगठनिक प्रस्तावमा?
महामन्त्री गगन थापाले पेश गरेको सांगठनिक प्रस्तावमा पछिल्लो समय इतिहासका संघर्ष र उपलब्धिहरू निरर्थक हुन् कि भन्ने गलत भाष्य निर्माण गर्न खोजिएको उल्लेख छ।
‘पछिल्लो समय प्रोपोगण्डाको राजनीतिले सिर्जना गरेको विगतमा केही पनि भएन भन्ने भास्यले आमजनता र खासगरी समर्थक शुभेच्छुकहरूलाई समेत दिग्भ्रमित बनाएको छ,’ थापाको प्रस्तावका १५ र १६ औं पृष्ठमा लेखिएको छ, ‘विगतमा गरेका राम्रा कामहरूको सही ढंगले सम्प्रेषण गर्न नसक्दा आजसम्म केही पनि भएन, इतिहासका संघर्ष र उपलब्धिहरू सब निरर्थक हुन् भन्ने गलत भास्य निर्माण गर्न खोजिएको छ। हुँदाहुँदा कतै यो परिवर्तन गरेर हामीले गल्ती नै पो गर्यौं कि भनेर यदाकदा पार्टीभित्रकै सानो तप्काले देखाउने द्विविधा र लघुताभासले त्यस्तो प्रोपोगण्डालाई थप मलजल गरेको छ।’
