नेपाली कांग्रेसका सांसद गगन थापाले अर्थतन्त्र सुधारका लागि सरकारले के काम गर्दैछ भनेर प्रधानमन्त्री पुष्पकमल दाहाल प्रचण्डलाई प्रश्न सोधेका छन्।
प्रतिनिधि सभाको आइतबारको बैठकमा प्रधानमन्त्रीलाई प्रश्न गर्दै थापाले नेपालको अर्थतन्त्रको सूचाङ्क सकारात्मक छ भन्ने सरकारको दाबी आंशिक मात्र सत्य रहेको बताए।
‘विदेशी मुद्रा सञ्चितीको क्षेत्र सबल देखिन्छ, विप्रेषण बढेको छ, आयात घटेको छ, ’ थापाले प्रश्न गरे, ‘यो बीचमा सरकारले त्यस्तो के गर्यो जसका कारणले विप्रेषण बढ्यो भनेर उसले भन्न सक्दछ? आन्तरिक उत्पादन गरेर त्यसले प्रतिस्थापन गरेर हाम्रो आयात घटेको हो? होइन। बजार शिथिल भएर घटेको हो।’
विदेशी मुद्रा सञ्चिती बढ्यो भनेर धेरै दंग पर्नु नपर्ने उनले बताए। यो आर्थिक वर्षको ६० प्रतिशत समय सकिँदै गर्दा ४० प्रतिशतको हाराहारीमा मात्र राजश्व उठेको र २१ प्रतिशत पूँजीगत खर्च भएको थापाको भनाइ छ।
‘यो सन्दर्भमा प्रधानमन्त्रीलाई मेरो प्रश्न छ- यो आर्थिक वर्षको बाँकी रहेको समयमा अहिले गरेकोभन्दा त्यस्तो के फरक गर्दै हुनुहुन्छ? जसको कारणले गर्दा अहिले नउठेको राजश्व उठ्छ, अहिले नभएको खर्च हुन्छ?,’ थापाले प्रश्न गरे।
कांग्रेसका महामन्त्रीसमेत रहेका थापाको प्रश्नमा जवाफ दिँदै प्रधानमन्त्री दाहालले अहिले अर्थतन्त्रका कतिपय परिसूचकहरू सकारात्मक रहेको बताए। ‘अर्थतन्त्र पूर्ण रूपमा चलायमान भइसकेको छैन,’ प्रधानमन्त्री दाहालले भने।
भिडिओ:
