नेपाली कांग्रेस केन्द्रीय सदस्य नैनसिंह महरले ११९ पृष्ठ लामो दृष्टिपत्र तयार पारेका छन्।
सोमबारदेखि गोदावरीमा सुरू हुने महासमिति बैठकमा उनले दृष्टिपत्र पेश गर्न लागेका हुन्।
नेपालको संविधानले आत्मसाथ गरेको संघीय समावेशी लोकतान्त्रिक गणतन्त्रको सफल कार्यान्वयन गर्दै जनताको समृद्धिको चाहनालाई पूरा गर्नु आजको आवश्यकता रहेको औंल्याउँदै महासमिति बैठकले यसबारे ठोस दिशा दिन सक्नुपर्ने उनले बताएका छन्।
‘विदेशमा रहनुभएका नेपाली दाजुभाइ तथा दिदीबहिनीहरूले पनि समृद्ध देश र गतिशील कांग्रेस खोजिरहनु भएको छ। उहाँहरू लगानीमैत्री वातावरणको खोजीमा हुनुहुन्छ। समृद्धिका लागि हामीसँगै यात्रा गर्न चाहिरहनु भएको छ। त्यसका लागि बृहत् योजना निर्माण गर्दै कार्यान्वयनका लागि ऐक्यबद्ध हुनु जरूरी छ। यो महासमिति बैठकबाट नेपाली कांग्रेसले तय गर्ने नीतिले जनतामा आशा जगाउने र सोही बाटो अवलम्बन गरेर जनताले खोजेको कांग्रेस निर्माण हुनेमा म आशावादी छु,’ उनले भनेका छन्।
उनले कांग्रेसकै नेतृत्वमा बनेको संविधानको कार्यान्वयनमा पार्टीले भूमिका खेल्नसक्नुपर्ने औंल्याएका छन्।
निःशुल्क स्वास्थ्य, शिक्षा, गुणस्तरीय यातायात तथा सञ्चारसँगै उद्यमशीलतासहितको रोजगारीको प्रबन्धका लागि पार्टीको भूमिकाको खाँचो पनि औंल्याएका छन्।
जलवायु परिवर्तन र विपद् व्यवस्थापनमा पार्टीले नयाँ अभियान अगाडि बढाउनुपर्ने उनको धारणा छ।
कृषि क्षेत्रको आधुनिकीकरण र आत्मनिर्भरता आर्थिक विकासको पहिलो शर्त भएको पनि बताएका छन्।
राष्ट्रिय स्वार्थकेन्द्रित विदेश नीति, डिजिटल अर्थतन्त्र, सुशासनको स्थपना भ्रष्टाचारको अन्त्य सुशासनको कडी भएको उल्लेख गरेका छन्।
शिक्षालाई उत्पादन र उत्पादनलाई बजारसँग जोड्न सके मात्र आर्थिक समृद्धि हासिल गर्न सकिने बताएका छन्।
त्यस्तै, पार्टी दिगो विकास लक्ष्य हासिल गर्न संकल्पित हुनुपर्ने पनि बताएका छन्।
