प्रतिपक्षी दल राष्ट्रिय प्रजातन्त्र पार्टी (राप्रपा)ले बुधबार प्रधानमन्त्रीलाई ४० बुँदे माग बुझाउँदै छ।
राप्रपाले राजसंस्था र हिन्दुराष्ट्रको पुनःस्थापना, प्रदेश संरचनाको खारेजी, भ्रष्टाचार नियन्त्रण, सुशासनको प्रत्याभूति लगायतका ४० बुँदे माग प्रधानमन्त्री पुष्पकमल दाहाल ‘प्रचण्ड’ लाई मागपत्र बुझाउन लागेको हो।
‘बुधबार काठमाडौंमा प्रधानमन्त्रीलाई र देशका सबै जिल्लामा प्रमुख जिल्ला अधिकारीमार्फत् सरकारलाई ज्ञापनपत्र बुझाउने र दबावमूलक प्रदर्शन गर्ने कार्यक्रम रहेको छ,’ पार्टी प्रवक्ता मोहनकुमार श्रेष्ठले जानकारी दिए।
आजै राप्रपाले काठमाडौंको भृकुटीमण्डपमा विरोध सभाको आयोजना गरेको छ।
विरोध सभाअगाडि भृकुटीमण्डपबाट भद्रकाली, सुन्धारा, वीर हस्पिटल, रत्नपार्क हुँदै पुनः भृकुटीमण्डपसम्म र्याली गरिने श्रेष्ठले जानकारी दिए।
‘दिउँसो साढे १ बजे अध्यक्ष राजेन्द्र लिङ्देनको नेतृत्वमा प्रधानमन्त्रीलाई ज्ञापनपत्र बुझाउने कार्यक्रम रहेको छ। ज्ञापनपत्र बुझाउँदै गर्दा पनि भृकुटीमण्डपमा सभा जारी रहने र ज्ञापनपत्र बुझाइसकेपछि अध्यक्ष र नेताहरुले सभालाई सम्बोधन गर्ने कार्यसूची रहेको छ,’ श्रेष्ठले भने।
