नेपाली कांग्रेसको महासमिति बैठकमा बुधबार विभिन्न प्रस्तावहरूमाथि महासमिति सदस्यहरूले सुझाव दिने क्रम सुरू भएको छ।
महासमिति सदस्यहरूले मुख्यगरी उपसभापति पूर्णबहादुर खड्काले पेश गरेको नीति, महामन्त्री गगन थापाले पेश गरेको सांगठनिक र अर्का महामन्त्री विश्वप्रकाश शर्माले पेश गरेको समसामयिक राजनीतिक प्रस्तावमाथि सुझाव दिनेछन्।
महासमितिमा अर्थमन्त्रीसमेत रहेका प्रवक्ता प्रकाशशरण महतले मुलुकको अर्थतन्त्रका अवस्था र लेखा समिति संयोजक श्याम घिमिरेले पेश गरेको लेखा प्रस्तावमाथि पनि सुझाव लिइने कांग्रेसले जनाएको छ।
कांग्रेसले यी प्रस्तावहरूमाथि छलफल गर्न चार समूह बनाएको छ। एक महासमिति सदस्यले ५ प्रस्तावमाथि ५ मिनेटभित्रै सुझाव दिइसक्नुपर्नेछ।
सनराइज सम्मेलन केन्द्रको मुख्य सभाहल गोदावरी हलमा कोशी र सुदुरपश्चिम प्रदेश, कोन्ज्योसोम हलमा लुम्बिनी प्रदेश, भ्रातृ तथा शुभेच्छुक संस्था र जनसम्पर्क समिति, फूलचोकी हलमा बागमती र गण्डकी प्रदेश र विशंखुनारायण हलमा मधेश र कर्णाली प्रदेशको समूहगत छलफल भइरहेको कांग्रेस प्रचार विभागले जानकारी दिएको छ।
कांग्रेस महासमिति बैठक बिहीबारसम्म चल्नेछ। समूहगत छलफलमा महासमिति सदस्यहरूले बुँदागत रूपमा सुझाव राख्ने प्रचार विभाग प्रमुख मीनबहादुर विश्वकर्माले जानकारी दिए।
