राष्ट्रिय स्वतन्त्र पार्टीका सांसद विराजभक्त श्रेष्ठले सरकारले प्रतिपक्षको कुरा नसुने संसदमात्र नभई सडकसमेत अवरूद्ध हुने चेतावनी दिएका छन्।
प्रतिनिधि सभाको बिहीबार बसेको बैठकमा सांसद श्रेष्ठले प्रतिपक्षले माग गरेका विषयहरूलाई सरकारले अन्सुना गरी जवाफ नदिएको भन्दै सदन र सडक दुवै अवरूद्ध गर्ने चेतावनी दिएका हुन्।
बालुकुमारी घटनाबारे प्रधानमन्त्री पुष्पकमल दाहाल ‘प्रचण्ड’ले सांसदहरूसँगको प्रश्नोत्तरमा आफू प्रतिवेदन पढ्ने क्रममै रहेको बताएका थिए। सांसद श्रेष्ठले तीन दिनसम्म पनि प्रतिवेदनले दोषि देखाएको व्यक्तिहरूमाथि कारबाही नहुनु दण्डहिनताको पराकाष्ठा रहेको बताए।
‘प्रधानमन्त्रीले प्रतिवेदन पढ्नुहुन्छ र केही कारबाही गर्नुहोला भनेर अपेक्षा गरेको अहिलेसम्म केहीपनि भएको छैन। तीन दिन भइसक्यो त्यो प्रतिवेदनको अध्ययन कहाँ पुग्यो? प्रतिवेदन के भयो ? यो दण्डहिनताको पराकाष्ठा हो,’ उनले भने, ‘प्रतिवेदन लामो भएर पढ्न गाह्रो भएको भए हामीलाई दिनुस् हामी वाचन गरेर सुनाइदिन्छौं।’
संसदप्रति सरकार जवाफदेहि हुँदैन भने मुलुकले कस्तो नेतृत्व पाइरहेको छ भन्ने प्रश्न उठ्ने पनि उनले बताए।
यसरी प्रतिपक्षलाई नसुन्ने हो भने संसद अवरूद्ध र आन्दोलन हुने उनले चेतावनी दिए। त्यसपछि सदन चल्न दिएन भनेर प्रतिपक्षमाथि सरकारले दोष थोपर्न नपाउने उनले बताए।
‘प्रतिपक्षको नेपथ्यबाट जनताको पीडा र स्तब्ध भएको कुरा राखिराख्दा सरकारले अनसुना गर्छ भने सदनमात्रै होइन सडकपनि अवरूद्ध हुन्छ,’ उनले भने।
मिटरब्याजीहरू प्रदर्शन पनि गर्न नपाएर माइतिघर भौँतारिरहँदा सरकार मिटरब्याज पीडितलाई न्याय दिँदैछौं भनेर सबैतिर जस बटुल्दै हिँडिरहेको श्रेष्ठले बताए।
‘मिटरब्याज पीडितहरू अझै पनि न्याय पाउन भौँतारिहनुपर्ने हो ? जवाफ छिटो आएन भने प्रतिपक्षको तर्फबाट हामी जेपनि गर्न सक्छौं भन्ने अहिले नै ध्यानाकर्षण गराउन चाहन्छौं,’ उनले भने।