नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले मिटरब्याज पीडितको क्रन्दन जारी रहेको बताएका छन्।
मेची किनार, महाकालीबाट पीडित आए पनि सरकारले बेवास्ता गरेको उनको भनाइ छ।
बिहीबार पार्टी केन्द्रीय कार्यालय च्यासलमा केन्द्रीय कमिटीको समापन समारोहलाई सम्बोधन गर्दै उनले यस्तो बताएका हुन्।
‘मिटरब्याज पीडित मेची किनार, महाकालीबाट काठमाडौं आए। उनीहरूको क्रन्दन जारी छ। सरकार कानमा तेल हालेर बसेको छ,’ उनले भने।
सरकार अलोकतान्त्रिक पद्धतिमा अघि बढेको उनले बताएका छन्।
उनले बालकुमारी घटनामा मन्त्रीलाई दोषी देखाएको प्रतिवेदनपछि पनि प्रधानमन्त्रीले मन्त्रीलाई बर्खास्त गर्न नसकेको बताए।
उनले दोषी ठहर गर्दा पनि कारबाही नहुनु अलोकतान्त्रिक पद्धति भएको बताए। उनले प्रधानमन्त्री निर्लज्ज भएर बसिरहेको जिकिर गरे।
उनले भने, ‘मान्छे मरेका छन्, युवाहरू मरेका छन्। युवा मारिएका विषयमा प्रतिवेदनले भन्छ मन्त्री दोषी छ, पहिलो पटक दुनियाँको इतिहासमा यस्तो सुनिँदैछ, सायद यस्तो हुँदैन। लोकतन्त्र मान्ने प्रणालीमा यस्तो हुँदैन। मन्त्री दोषी छ जसले गर्दा युवा मारिए। आफैंले सरकारले बनाएको आयोगले तोकेको छ, दोषी मन्त्री छ। मन्त्री फूर्तिसाथ हिँड्छ। आत्मग्लानी छँदै छैन। न सरकारलाई न मन्त्रीलाई। प्रधानमन्त्रीलाई अप्ठ्यारो भएको छैन। मन्त्रीले राजीनामा नगरे हटाउनु पर्दैन? मन्त्री निर्लज्ज भयो भने निर्लज्ज हुने, गठबन्धन नै निर्लज्ज हुने। एउटा व्यक्तिको स्वार्थमा, एउटा सानो दलको स्वार्थमा सिंगो देश अलोकतान्त्रिकमा जाने। नैतिकता भन्नेकुरा सिंगै देशले छोड्ने?’
अध्यक्ष ओलीले एउटा व्यक्तिको स्वार्थमा सिंगो देश नै अलोकतान्त्रिक भएको बताए।
एमालेको बैठक कर्मकाण्डी नहुने भन्दै उनले भने, ‘हाम्रा बैठक कर्मकाण्डी हुँदैनन्, अरू दलका हुन्छन्, महाधिवेशनमा नीतिमा छलफल हुन्न, नेतृत्व छान्छ। अहिले कांग्रेसको महासमितिमा जनताका कुरा हुँदैनन्। एमालेको विरोध मात्र हो।’
