नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड' सोमबार बिहान हरिसिद्धि पुगे।
हरिसिद्धिमा नेपाल कम्युनिष्ट पार्टीका महासचिव नेत्रविक्रम चन्दको निवास पुगेर प्रचण्डले करिब ४५ मिनेट कुराकानी गरे, विप्लवले लगाएका धान खेत अवलोकन गरेर खुमलटार फर्किए।
अध्यक्ष प्रचण्ड र महासचिव चन्दबीच के-के विषयमा कुराकानी भयो? अध्यक्ष प्रचण्डका प्रेस सल्लाहकार गोविन्द आचार्यका अनुसार भेटवार्ता समसामयिक राजनीतिक घटनाक्रम र पार्टी एकताकै विषयमा केन्द्रित रह्यो।
'उहाँहरूबीच समसामयिक राजनीति र पार्टी एकताका विषयमा छलफल भएको छ। समग्रमा छलफल सकारात्मक रह्यो,’ उनले भने।
साउनमा बसेको माओवादी केन्द्रको स्थायी समिति बैठकले विप्लव नेतृत्वको नेकपासँग पार्टी एकता गर्ने निर्णय गरेको थियो तर भदौ पहिलो साता कटिसक्दा पनि प्रक्रिया अघि बढिसकेको छैन।
माओवादीले पार्टी एकता गर्ने भनेर गरेको निर्णयलाई नेकपाले 'एकतर्फी' भनेको थियो।
माओवादी केन्द्रले निर्णय गरे पनि नेकपाले भने त्यसबारेमा पार्टीभित्र बहस नचलाएको नेकपाका प्रवक्ता खड्कबहादुर विश्वकर्मा 'प्रकाण्ड'ले बताए।
अनौपचारिक रूपमा नेताहरूले एकताको आधार र उद्देश्य प्रष्ट पार्न माओवादीलाई भनेका थिए।
सोमबार अध्यक्ष प्रचण्ड हरिसिद्धी आएपछि समसामयिक विषय र पार्टी एकताका विषयमा कुराकानी भएको प्रकाण्डको भनाइ छ।
उनका अनुसार भेटवार्तामा दुई वटा विषयमा कुराकानी भयो।
पहिलो, देशको स्थितिबारे।
'पछिल्लो समय भूराजनीतिक विषयमा चुनौतीपूर्ण अवस्थामा रहेको दुई नेताको विश्लेषण रह्यो। लिपुलेकको विषय र एमसिसीका कारण भूराजनीतिक चुनौती बढेको देखाउँछ। देशभित्र पनि अवस्था क्रिटिकल नै रहेको भन्ने निष्कर्ष रह्यो,' उनले भने। प्रचण्ड प्रधानमन्त्री हुँदा संसदबाट एमसिसी पारित भएको थियो।
अध्यक्ष र महासचिवबीच भेटवार्तामा भएको दोस्रो विषय, पार्टी एकताबारे हो।
प्रचण्डले स्थायी कमिटी बैठकले गरेको निर्णयको विप्लवसँगको भेटमा व्याख्या गरेर सुनाएका थिए।
'गम्भीरता र इमानदारिताका साथ एकता गर्ने निर्णय गरेका हौं, कम्युनिस्टहरूको एकता राष्ट्रिय राजनीतिको आवश्यकता पनि हो,' प्रचण्डको भनाइ उद्धृत गर्दै प्रकाण्डले भने।
जबाफमा महासचिव विप्लवले कम्युनिस्ट आन्दोलन र राजनीतिक आन्दोलनको समीक्षा गर्ने बेला भएको बताए। अहिलेको समस्या यथास्थितिबाट समाधान नहुने र त्यसका लागि नयाँ राजनीतिक मार्गचित्र आवश्यक हुने उनको भनाइ थियो।
'त्यसको नेतृत्व गर्नका लागि विचार र राजनीतिक दृष्टिले कम्युनिस्टहरू जिम्मेवार हुन्छन्। क्रान्तिकारी कम्युनिस्ट पार्टी निर्माण, समाजवादी क्रान्ति, समाजवादी व्यवस्था स्थापना र अहिलेको समस्याको समाधान, जनताको अधिकार स्थापना र राष्ट्रको स्वाधीनता मुख्य कुरा हो। यो हाम्रो मिसन हो। योभन्दा दायाँ बायाँ गर्दैनौं,' विप्लवको भनाइ उद्धृत गर्दै प्रकाण्डले भने।
पार्टी एकताबारे आगामी केन्द्रीय समिति बैठकले निर्णय गर्ने जबाफ पनि विप्लवले प्रचण्डलाई दिएका थिए।
प्रकाण्डका अनुसार भदौको अन्तिम सातातिर पार्टी केन्द्रीय कमिटी बैठक बस्ने तयारी छ।
-1746009348.jpg)
