राष्ट्रिय प्रजातन्त्र पार्टी (राप्रपा) ले आन्दोलन परिचालन समिति गठन गरेको छ।
प्रवक्ता ज्ञानेन्द्र शाही संयोजक र सदस्यहरूमा प्रवक्ता गोपाल दाहाल सदस्य, सहमहामन्त्री धनबहादुर बुढा, सहमहामन्त्री रवीन्द्रप्रताप शाह रहेको तीन सदस्यीय समिति गठन भएको हो।
राप्रपा केन्द्रीय कार्यसम्पादन समितिको मंसिर ११ को निर्णयअनुसार अध्यक्ष राजेन्द्र लिङ्देनले शाहीको संयोजकत्वमा आन्दोलन परिचालन समिति गठन गरेका हुन्।
राप्रपाले मंसिर २३ गते काठमाडौंको रत्नपार्कमा कार्यक्रम गर्दैछ। त्यसका लागि समग्र तयारी र रणनीति निर्माणका लागि पार्टीले आन्दोलन परिचालन समिति गठन गरेको संयोजक शाहीले सेतोपाटीलाई जानकारी दिए।
समितिको पहिलो बैठक आज पार्टी केन्द्रीय कार्यालय धुम्बाराहीमा बसेको छ।
बैठकमा अध्यक्ष लिङ्देन उपस्थित थिए। उनले आन्दोलनका एजेन्डा तथा व्यवस्थापनबारे निर्देशन दिएको पनि शाहीले जानकारी दिए।
आन्दोलनलाई शान्तिपूर्ण, संगठित र प्रभावशाली बनाउन आवश्यक तयारीबारे विस्तृत छलफल गरिएको उनको भनाइ छ।
-1746009348.jpg)
