नेपाली कांग्रेस सुनसरीले जेनजी आन्दोलनका क्रममा निजी तथा सरकारी सम्पत्तिमा तोडफोड र आगजनी गर्ने कार्यमा संलग्न रहेका कार्यकर्ताहरूको क्रियाशील सदस्यता नवीकरण नगर्ने निर्णय गरेको छ।
जिल्ला सभापति केदार भण्डारीले भदौ २४ गते निजी तथा सरकारी सम्पत्तिमाथि तोडफोड र आगजनीमा संलग्न रहने कुनै पनि कार्यकर्ताको क्रियाशील सदस्यता पार्टीले नवीकरण नगर्ने निर्णय गरेको सेतोपाटीलाई जानकारी दिए।
‘भदौ २३ को जेनजी आन्दोलनमा गएकाहरूलाई केही गर्दैनौं तर भोलिपल्ट २४ गते निजी र सरकारी सम्पत्तिमा तोडफोड र आगजनी गर्नेको क्रियाशील सदस्यता नवीकरण गर्दैनौं, त्यस्ता व्यक्तिहरूलाई नयाँ क्रियाशील सदस्यता पनि दिँदैनौं,’ उनले भने।
जिल्ला कार्यसमितिको यो निर्णय कार्यान्वयन वडा कार्यसमितिमार्फत् हुने पनि उनले बताए। वडाले क्रियाशील सदस्यता नवीकरण र नयाँ वितरणका बेला सम्बन्धित व्यक्ति जेनजी आन्दोलनमा तोडफोड र आगजनीमा संलग्न रहे वा नरहेकोबारे बुझ्ने काम गर्ने पनि उनले बताए।
कांग्रेसले पुस १६ गतेदेखि अधिवेशन सुरू गर्दैछ। त्यसअघि क्रियाशील नवीकरण र नयाँ वितरण कार्य हुनेछ। पुस २६ देखि २८ गतेसम्म केन्द्रीय महाधिवेशन तोकिएको छ।
-1746009348.jpg)
