मधेस प्रदेशका नवनियुक्त मुख्यमन्त्री कृष्णप्रसाद यादव पहिलोपटक प्रदेश सभामा चुनिएर आएका सांसद हुन्।
रौतहट १ को प्रदेश सभा निर्वाचन क्षेत्र नम्बर २ बाट प्रत्यक्ष निर्वाचित यादवले यसअघि प्रदेशमा भौतिक मन्त्रालयको मन्त्रीका रूपमा जिम्मेवारी सम्हालिसकेका छन्।
कांग्रेस संसदीय दलका नेता यादव लगातारको अस्थिरतापछि शुक्रबार मधेसको मुख्यमन्त्रीमा नियुक्त भएका हुन्। आइतबार उनले पद तथा गोपनीयताको शपथ लिँदैछन्।
भदौ २३–२४ को जेनजी आन्दोलनयता लगातार सरकार बन्ने र ढल्ने क्रम चलिरहेको मधेसमा तीन महिना बीचमा बनेका चौथो मुख्यमन्त्री हुन् उनी। यसअघि सतिशकुमार सिंह, जितेन्द्र सोनल र सरोजकुमार यादव मुख्यमन्त्री भइसकेका छन्।
कांग्रेस, जसपा नेपाल, जनमत पार्टी, नेकपा माओवादी केन्द्र, नेकपा एकीकृत समाजवादी र लोसपा नेपाल पार्टीको समर्थनमा मुख्यमन्त्री बनेका उनले नागरिक उन्मुक्ति पार्टीको समर्थन पनि रहेको बताइरहेका छन्।
मुख्यमन्त्री पदको शपथ लिने तयारीमा रहेका मुख्यमन्त्री यादवसँग हामीले संक्षिप्त कुराकानी गरेका छौं।
प्रस्तुत छ, कुराकानीको सम्पादित अंश–
मधेस प्रदेशमा लगातारको अस्थिरता र लामो रस्साकस्सीपछि मुख्यमन्त्रीको पदमा आसिन हुन पुग्नुभएको छ। अब कसरी अघि बढ्ने विचार गर्नुभएको छ ?
जे–जति चुनौती मोलेर, जति परिश्रम गरेर मुख्यमन्त्रीमा नियुक्त भएँ, त्योभन्दा बढी चुनौती हाम्रा अगाडिका कामहरूमा छन्। हामीले जति रस्साकस्सी गरेर र कठिन परिश्रम गरेर यहाँ पुगेका छौँ, त्योभन्दा बढी कठिन परिश्रम गरेर अगाडि बढ्छौँ। त्यही हाम्रो टार्गेट हुन्छ।
तपाईंको प्रमुख प्राथमिकता चाहिँ के हुन्छ?
मुख्य प्राथमिकता भनेको सुशासनकै हुनेछ। अहिलेसम्म यो प्रदेशलाई जुन बेथितिमा राखिएको थियो, त्यो हटाउने काममा मेरो ध्यान हुनेछ। मधेस प्रदेशमा सुशासन कायम गर्ने, प्रदेशको आर्थिक वृद्धिलाई अगाडि बढाउने। र, यो देशमा एउटा समृद्ध मधेस प्रदेशको अवधारणा ल्याएर मधेस प्रदेशलाई समृद्ध प्रदेश बनाउने कुरामा हाम्रो ध्यान केन्द्रीत हुनेछ। सुशासनसँगै कृषि, शिक्षा, स्वास्थ्य, पूर्वाधार र पर्यटन क्षेत्रको विकास यही हो मेरो प्राथमिकता।
लगातारजसो सरकार फेरिने खेल प्रदेशमा चलिरहेकै छ। यस्तो चक्रले तपाईं नेतृत्वको सरकार पिरोलिने त्रास कतिको छ?
अब अस्थिरता नहोला भन्ने लाग्छ मलाई। अब स्थिर सरकारै अगाडि जाने हो। किनभने हामी काम र व्यवहारले देखाउँछौं। हामीसँग एमालेबाहेक सम्पूर्ण दल साथमा छन्। हामी सात दलीय गठबन्धनको सरकार हो। सबैको भावना समेटेर हामी अगाडि बढ्नेछौँ।
सबै दल र यहाँका जनता, र मलाई लाग्छ, प्रतिपक्षमा बस्ने सांसद र दलका मित्रहरूले पनि मलाई सहयोग गर्नुहुन्छ भन्ने अपेक्षा राखेको छु। यो भन्दा अगाडि किन धेरै सरकार फेरिए, के कारणले फेरिए, त्यहाँ भएको कमजोरीहरूलाई म सच्याउँदै अगाडि बढ्छु। त्यसैले त्यस्तो त्रास छैन।
सरकार लामै अवधि अघि बढ्छ भन्ने तपाईंको आत्मविश्वासको आधार के हो?
त्यो बेला अपरिपक्व सरकार बनेको थियो। एकदमै टाइट बहुमतमा थियो। हाम्रो कम्फर्टेबल बहुमत पनि छ। र, मलाई विश्वास छ, एमालेले पनि हामीलाई साथ सहयोग दिन्छ जस्तो लाग्छ। त्यही भएर यो सरकार ढल्ने–गिर्नेतिर जाँदैन भन्नेमा हामी निश्चिन्त छौँ।
नेपालमा संघीयता ल्याउने आन्दोलनको मुख्य अगुवाइ मधेसले गरेको थियो। संघीयता कार्यान्वयनपछि पनि केन्द्रसँग लडेको प्रदेश भनेर चिनिन्छ मधेस। संघीयतालाई बलियो बनाउन तपाईंको भूमिका के रहन्छ?
संघीयता जेको लागि आएको छ, त्यसैका लागि कार्यान्वयन गर्ने हो। मान्छेको इच्छा, अपेक्षा, र संघीयता ल्याउँदाका कार्यभार के छन्, त्यसलाई हामीले ‘इम्प्लिमेन्टेसन’ गर्ने हो। संघीयतालाई झन् सबल र मजबुत बनाउने हो। यो मधेस प्रदेशका लागि सबभन्दा महत्वपूर्ण प्राथमिकता संघीयताको सफलता नै हो।
अहिलेसम्म अन्य प्रदेशमा एमाले र कांग्रेसबीच सहकार्य छ, तर यहाँ एमाले विपक्षमा रहने जस्तो स्थिति छ। त्यसलाई कसरी मिलाउनुहुन्छ?
म मिलाउँछु। मलाई विश्वास छ, प्रतिपक्षमा बसेर उहाँहरूले पनि सहयोग गर्नुहुन्छ। सरकारले राम्रो काम गर्छ, उहाँले सहयोग गर्नुहुन्छ। मलाई लाग्छ, उहाँहरू पनि अब प्रतिपक्षभन्दा पनि सत्ता पक्षतिर नै अघि बढेर जिम्मेवार भएर काम गर्नुहुन्छ।
तपाईंको मन्त्रिमण्डल कस्तो हुन्छ? कति सदस्यसम्म हुन सक्छ?
संविधानभन्दा बाहिर हामी हुँदैनौँ। संविधानले जुन मार्गदर्शन दिएको छ, त्यसभन्दा भित्र बसेर हामी काम गर्छौं।
कहिले विस्तार गर्नुहुन्छ मन्त्रिपरिषद्?
अब दुई–तीन दिनमा।
आइतबार शपथ लिँदै हुनुहुन्छ। तपाईं मात्रै लिने कि मन्त्रीहरूको पनि शपथ हुन्छ?
यो विषयमा अरू दल र साथीहरूसँग छलफल गर्न बाँकी छ।
-1746009348.jpg)
