नेपाली कांग्रेसले प्रतिनिधि सभा पुनर्स्थापना माग गर्दै सर्वोच्च अदालतमा रिट पेस गरेको छ।
प्रमुख सचेतक श्यामकुमार घिमिरे, सचेतक सुशीला थिङसहितले प्रतिनिधि सभा पुनर्स्थापना माग गर्दै आज सर्वोच्चमा रिट पेस गरेका हुन्।
यो रिट दर्ता भइसकेको छैन।
‘हामीले प्रतिनिधि सभा पुनर्स्थापनालगायत माग गरेर आज रिट दिएका हौं,’ घिमिरेले सेतोपाटीसँग भने, ‘निवर्तमान प्रतिनिधि सभा सांसदहरूको हस्ताक्षर वारेसमार्फत् पठाएर पूर्वमहान्यायाधिवक्ता खम्मबहादुर खातीले रिट दिनुभएको हो।’
कांग्रेसका प्रमुख सचेतक घिमिरेसहित विघटित प्रतिनिधि सभाका ८ जना सांसदले सर्वोच्च अदालतमा प्रतिनिधि सभा विघटनविरूद्ध रिट पेस गरेका हुन्।
सर्वोच्च अदालतका सहरजिस्ट्रार तथा प्रवक्ता अर्जुनप्रसाद कोइरालाले विघटनविरूद्ध कांग्रेसका सचेतकसहितले रिट पेस भएको बताए। ‘रिट आज पेस भएको छ। अध्ययनको क्रममै छ। दर्ता भइसकेको छैन,’ उनले भने।
यसअघि गत शुक्रबार एमाले अध्यक्ष केपी शर्मा ओली र कांग्रेस सभापति शेरबहादुर देउवाबीच महाराजगञ्जमा भेटवार्ता भएको थियो।
यसअघि एमाले पनि प्रतिनिधि सभा पुनर्स्थापनाको माग राख्दै सर्वोच्च गएको थियो।
जेनजी आन्दोलनपछि भदौ २४ गते प्रधानमन्त्री केपी शर्मा ओलीले पदबाट राजीनामा दिएका थिए। त्यसपछि पूर्व प्रधान न्यायाधीश सुशीला कार्की नेतृत्वमा नयाँ सरकार गठन भएको थियो।
कांग्रेसले पूर्वप्रधान न्यायाधीशको नेतृत्वमा सरकार बनाउन नमिल्ने भन्दै रिट दिएको छ। भदौ २७ गते कार्की प्रधानमन्त्री नियुक्त भएकी थिइन् भने सोही दिन उनले प्रतिनिधि सभा विघटन र फागुन २१ मा चुनाव घोषणा गर्न राष्ट्रपतिसमक्ष सिफारिस गरेकी थिइन्।
कांग्रेसले फागुन २१ को आमचु्नावमा भाग लिने निर्णय केन्द्रीय समिति बैठकबाट गरिसकेको छ।
-1746009348.jpg)
