राष्ट्रिय योजना आयोगका नवनियुक्त उपाध्यक्ष डा. प्रकाशकुमार श्रेष्ठ र सदस्य प्राध्यापक सुनीति श्रेष्ठ (हाडा) ले पद तथा गोपनीयताको सपथ ग्रहण गरेका छन्।
मंगलबार आयोजित एक कार्यक्रममा उपाध्यक्ष श्रेष्ठले आयोगका अध्यक्ष तथा प्रधानमन्त्री सुशीला कार्कीसमक्ष सपथ लिएका हुन्।
त्यसलगत्तै सदस्य हाडाले प्रधानमन्त्री कार्कीको उपस्थितिमा उपाध्यक्ष श्रेष्ठसमक्ष सपथ लिइन्।
कार्यक्रममा योजना आयोगका सदस्य तथा मुख्यसचिव सुमनराज अर्याल, प्रधानमन्त्री कार्यालयका सचिव राजकुमार श्रेष्ठ, आयोगका सचिव रविलाल पन्थ लगायत सरकारी उच्च अधिकारीहरूको उपस्थिति थियो।
सपथपछि प्रधानमन्त्री कार्कीले नवनियुक्त उपाध्यक्ष र सदस्यलाई बधाई दिँदै सफल कार्यकालको शुभकामना व्यक्त गरिन्।
उनले अहिले मुलुकको अवस्था राम्रोसँग अध्ययन गरी जेनजी युवाहरूको आकांक्षा बमोजिमका योजना तयारी गर्न निर्देशन दिइन्।
'हामीले तपाईँहरूलाई विज्ञका रूपमा यो जिम्मेवारी दिएका हौं,' प्रधानमन्त्री कार्कीले भनिन्, 'मुलुकको अहिलेको परिस्थितिबारे जानकार नै हुनुहुन्छ। यो परिस्थिति बुझेर हामीले पाइला चाल्नुपर्नेछ। देशका योजना तथा कार्यक्रम पनि परिवर्तनका लागि युवाले गरेको आन्दोलनको भावनाअनुरूप तर्जुमा गर्नुपर्छ। अहिलेको परिस्थितिको राम्रोसँग अध्ययन गरी मुलुकको साख उठाउने हिसाबले काम गर्नुपर्छ। मलाई आशा छ, तपाईंहरू यस कार्यमा सफल हुनुहुनेछ।'
मन्त्रिपरिषदको सोमबारको बैठकले आयोगका उपाध्यक्ष र सदस्य नियुक्तिसम्बन्धी निर्णय गरेको थियो।
-1746009348.jpg)
