नेकपा (एमाले) का अध्यक्ष केपी शर्मा ओलीले आफ्नो पार्टी राष्ट्रिय झण्डा ओढेर सिंहदरबार जलाउनेवाला पार्टी नभएको बताएका छन्।
शुक्रवार ११ औं महाधिवेशनबाट निर्वाचित पार्टी केन्द्रीय कमिटीको पहिलो बैठकलाई सम्बोधन गर्दै उनले सो टिप्पणी गरेका हुन्।
अध्यक्ष ओलीले एमाले लोकतान्त्रिक, साँचो कम्युनिस्ट पार्टी भएको जिकिर गर्दै त्यसका हरेक सदस्यहरूले कडा अनुशासनमा रहेर काम गर्नुपर्ने बताए।
उनले पार्टीको सामूहिक प्रयासबाट निकालिएका नीति विपरीत नचल्न पनि पार्टीका नेता, कार्यकर्तालाई सचेत गराए। अध्यक्ष ओलीले पार्टीको बैठकमा मोबाइल चलाउने काम नगर्न पनि नेता, कार्यकर्तालाई निर्देश गरे।
उनले भने,‘एमाले जस्तो साँचो कम्युनिस्ट पार्टी। यो झण्डा ओढेर सिंहदरबार जलाउने जस्तो नक्कली आवरण, नक्कली अर्कै कामवाला पार्टी होइन। यस्तो पार्टीको साँच्चै दृढ अनुशासन चाहिन्छ। म कमरेडहरूलाई भन्न चाहन्छु–हाम्रो पार्टी लोकतान्त्रिक पार्टी हो। त्यसकारण हरेक व्यक्ति स्वतन्त्र छ। हरेक व्यक्ति आफ्नो अध्ययन, आफ्नो चिन्तन, आफ्ना विचार, आफ्ना निष्कर्षहरू निकाल्न पाउँछ। र योगदान गर्न पाउँछ।’
उनले थप भने, ‘तर पार्टीका नीति, निर्णयभन्दा विपरीत स्वतन्त्रताको नाममा आफ्नो अध्ययन र निष्कर्षका नाउमा पार्टीका नीति, निर्णय, जो हाम्रा सामूहिक बलबाट, प्रयासबाट निकालिएका छन। ती सामूहिक प्रयासका विरूद्ध मेरा निजी कुरा भनेर सामूहिक हितका विरूद्ध मेरो निजी हित भनेर राष्ट्रिय स्वार्थका विरूद्ध मेरो निजी स्वार्थ भनेर चल्न हुँदैन। त्यसलाई अनुशासन भनिँदैन। र त्यो अनुशासन पनि होइन। बैठकमा मोबाइल बज्न हुँदैन।’
अध्यक्ष ओलीले राष्ट्रिय स्वार्थ विपरीतका गतिविधि पार्टीका कुनै पनि समस्यले गरे सह्य नहुने समेत बताए। –न्युज एजेन्सी नेपाल
-ink-1766136526.jpeg)
-1746009348.jpg)
