बूढीगण्डकी बाढीले बगाएको कुकुरलाई २० दिनपछि उद्धार गरिएको छ।
असोज २५ को बूढीगण्डकी बाढीले गोरखाको धार्चे गाउँपालिका १ ठाडो भर्याङका दयाराम कार्कीको घरमा पालेका कुकुर बगाएको थियो।
कार्कीका घरमा तीन वटा कुकुर थिए। तीमध्ये सेती कुकुर गत बुधबार चुमनुब्री ३ जगत र धार्चे १ ठाडो भर्याङको सीमा क्षेत्र जगत बगर पारि देखा परेको थियो।
कुकुर बूढीगण्डकीको भङ्गालो पार गरेर वारि जगततर्फ आउन सकेन भने स्थानीय बासिन्दाहरू कुकुर भएको ठाउँसम्म पुग्न सकेका थिएनन्। कुकुर भोकै थियो, ऊ फसेको ठाउँमा खानेकुरा थिएन।
दयाराम र स्थानीय युवाहरूले कुकुरलाई खाने कुरा दिन प्रयास गरेका थिए तर बिस्कुट नदी कटाएर कुकुर भएको ठाउँसम्म पुर्याउन सकेका थिएनन्। कुकुर भएको ठाउँको एकातर्फ छङ्गाछुर भिर थियो भने अर्कोतर्फ बूढीगण्डकीको भङ्गालो।
चुमनुब्री गाउँपालिका, मनास्लु मनास्लु संरक्षण क्षेत्र आयोजना, भेटेरिनरी अस्पताल तथा पशु सेवा कार्यालय गोरखालगायत सरकारी निकाय र एनिमल नेपाल, गोरखा जेसिजलगायत संस्थाको पहल र सहयोगमा कायाकिङ तथा र्याफ्टिङ टोलीले कुकुर उद्धार गरेको हो।
तीन दिनको लगातार प्रयासपछि कुकुर उद्धार सफल भएको गाउँपालिका अध्यक्ष निमा लामाले सेतोपाटीलाई बताए।
‘सिमसिम पानी परिरहेको थियो, उर्लेको बूढीगण्डकीमा हेलिएर धादिङको रोयल बिच क्याम्पका राम सिलवाल, अरूण थपलियासहित टोलीले कुकुर उद्धार गर्नुभयो, उहाँहरूलाई धन्यवाद छ,’ गाउँपालिका अध्यक्ष लामाले सेतोपाटीसँग भने।
सिलवालको टोली धादिङदेखि कायाकिङ बोकेर जगत बगर क्षेत्र पुगेका थिए। कायाकिङमा राखेर सेती कुकुरको उद्धार गरिएको हो।
उक्त टोलीलाई गाउँपालिका अध्यक्ष लामाले खादा लगाएर धन्यवादसमेत दिएका छन्। ‘सेती कुकुरले २० दिनपछि घरधनी दयारामलाई पनि जगत बगरमै भेट्यो,’ उनले भने, ‘मैले सेती कुकुरलाई खादा लगाइदिएँ, आयु बढोस् भनेको छु।’
सुरूमा कुकुरलाई हेलिकप्टरबाट उद्धार पहल गरिएको थियो। पर्यटन व्यवसायीसमेत रहेका रास्वपा चुमनुब्री अध्यक्ष धावा ग्याल्जेन लामा, स्थानीय बासिन्दा वीरबल घले, गाउँपालिका अध्यक्ष लामालगायतले यस कार्यमा पहल गरे पनि उडान अनुमति र मौसम प्रतिकूल हुँदा विकल्प खोज्नुपरेको थियो।
हेलिकप्टरबाट कुकुर उद्धार गर्न पनि एनिमल नेपालले सहयोग गर्ने तयारी गरेको थियो। त्यो सम्भव नभएपछि एनिमल नेपालकै पहलमा कायाकिङ तथा र्याफ्टिङ टोलीसमेत पठाएर कुकुरको उद्धार गरिएको छ।
‘दुई हप्ताभन्दा बढी समय अलपत्र परेपछि, सेती अन्ततः घर आइपुगेकी छिन्,’ एनिमल नेपालले भनेको छ, ‘साहस, करूणा र अविश्वसनीय सामूहिक प्रयासले सम्भव भएको उद्धार हो यो। एउटा जीवन सुरक्षित रूपमा उनको परिवारसँग पुनर्मिलन भयो र अर्को उद्धार अझै बाँकी छ।’
जगत बगर पारि जंगल क्षेत्रमा बाख्राहरू छन्। ती बाख्राहरू पनि असोज २५ को बाढीपछि बूढीगण्डकी पार गरी खोर फर्कन सकेका छैनन्। गाउँपालिका अध्यक्ष लामाले बाख्राहरू जंगलमा चरिरहेको देखिएको र केही दिनपछि मात्रै उद्धार गरिने बताए।
‘ठूलो मेहनतका साथ कुकुरको उद्धार सम्भव भयो, बाख्रा जंगलमा चरिरहेका छन्, केही दिनमै उद्धार गर्छौं, कुकुर त भोकै थियो, त्यसैले पनि उद्धार छिटो गर्नुपर्ने थियो,’ उनले भने, ‘कुकुरलाई घरधनीको जिम्मा लगाइएको छ।’
