नेपाली कांग्रेसका महामन्त्री गगन थापाले आगजनीमा परेको आफ्नो घरमा चोर सुतिरहेको पाइएको प्रसंग सुनाएका छन्।
महामन्त्री थापाले यो कुरा आज काठमाडौं क्षेत्र नम्बर ४ का नेता कार्यकर्तासँग भेला भएको कार्यक्रममा सुनाएका हुन्।
जेनजी आन्दोलनका क्रममा थापाको रातोपुलस्थित घरमा भदौ २४ गते आगजनी भएको थियो।
‘घर आगजनीमा परेपछि राति परिवारलाई एकातिर पठाइयो, म अर्कोतिर लागेँ। भोलिपल्ट मात्र आमासँग कुरा भयो, तेस्रो दिन हाम्रा साथीहरू घरमा जाँदै गर्दा त एउटा चोर त मेरै लुगा लगाएर मेरै खाटमा सुतिरहेको,’ महामन्त्री थापाले भने, ‘कहाँबाट आए भनेको त, पहिलो दिन लुगा चोरेर लगेको रहेछ, केही बाँकी छ कि भनेर आएको रे। एकछिन सुत्न मन लाग्यो रे, माथिको कोठा चाहिँ आगो लागेको थिएन, त्यही सुतेको रे। साथीहरूले त्यहीँबाट नियन्त्रणमा लिएर गए। त्यस्तो खालको स्थिति बन्यो केही दिन।’
उनले डेरा खोजे पनि केही दिन नपाइएको पनि बताए।
‘म त्यहीँ घरमा जन्मेहुर्केको। काठमाडौंमा डेरा बसेको अनुभव पनि भएन। बानेश्वरतिर डेरा खोजेको, को बस्ने, म बस्ने भन्ने भएपछि त यहाँ त पानीको समस्या छ भनेर पठाइदिनुभयो,’ उनले भने, ‘अहिले बूढानीलकण्ठ चपलीमा एउटा स्कुल रहेको ठाउँमा आमाबुवासँगै बसिरहेको छु।’
रातो पुलको घर भने भत्काएर बनाउनुपर्ने उनले बताए।
-1765117883.JPG)
-1746009348.jpg)
