नेकपा (एमाले) का नवनिर्वाचित सचिव शेरधन राई सहितका केन्द्रीय कमिटीका केही नेता मंगलबार विराटनगरस्थित पार्टी कार्यालयमा पत्रकारहरूमाझ उपस्थित थिए।
त्यसक्रममा एमाले कोशी प्रदेश कमिटीका अध्यक्ष घनश्याम खतिवडाले एउटा विज्ञप्ति सार्वजनिक गरे।
‘आज केही महत्वपूर्ण कुराहरू हामी एक्सपोज गर्दैछौं,’ भनेर विज्ञप्ति पढ्न थालेका प्रदेश अध्यक्ष खतिवडाको निचोड त्यही थियो, जुन केही दिनअघि अध्यक्ष केपी शर्मा ओलीले महाधिवेशनस्थलमा सुनाएका थिए।
प्रदेश अध्यक्ष खतिवडाले भने, ‘अहिलेको असंवैधानिक सरकार एमाले नेताहरूमाथि धरपकड थाल्ने तयारीमा छ। प्रतिवादका लागि आजैबाट कोशीका १४ वटै जिल्लामा आन्दोलन सुरू भएको छ।’
डेढ पृष्ठ लामो विज्ञप्ति खतिवडाले वाचन गरेर सुनाइसकेपछि केन्द्रीय कमिटीका सचिव शेरधन राईले त्यसबारे पत्रकारहरूका प्रश्नका उत्तर दिए। त्यसक्रममा पूर्वमुख्यमन्त्री राईले ‘चुनाव असम्भव’ रहेको मात्रै बताएनन्, संसद पुनर्स्थापनाको पार्टी लाइनको जमेर पैरवी पनि गरे। र, त्यसैका लागि कोशीका सबै जिल्लामा आन्दोलन हुने उनले बताए।
पार्टी सचिव राईले विराटनगरमा यस्तो बताइरहँदा काठमाडौंमा भने प्रतिनिधि सभा निर्वाचनका लागि ‘खुसुखुसु’ उम्मेदवारको नाम मागिएको भन्दै एमाले संस्थापनइतर पक्षले प्रश्न उठाइरहेको थियो।
एकातिर संसद पुनर्स्थापनाका लागि अदालत गइसकेको एमाले उम्मेदवारहरूको नाम पनि मागिरहेको छ। चुनावका लागि समानुपातिक उम्मेदवारको नाम सिफारिस गर्ने तयारीमा रहेको त्यही दल आन्दोलन पनि घोषणा गरिरहेको छ।
यो कदम संगतिपूर्ण हुन्छ कि हुन्न? पत्रकारहरूको प्रश्नमा सचिव राईले दिएको जबाफ थियो, ‘सरकार नै असंवैधानिक छ, त्यही असंवैधानिक सरकारले बनाएको कथित आयोगले अनावश्यक रूपमा दुःख दिने नियत राखेर मुठभेड निम्त्याउने प्रयास गरिरहेको छ।’
उनका अनुसार सरकारको यही ‘षड्यन्त्रविरूद्ध’ कोशी का १४ जिल्ला कमिटीहरूलाई शान्तिपूर्ण रूपमा खबरदारी प्रदर्शन, सद्भाव र्याली र विभिन्न स्वरूपका विरोधका कार्यक्रमहरू सञ्चालन गर्न आह्वान गरिएको हो।
‘सरकारबाट गरिने कुनै पनि प्रकारका प्रतिशोधपूर्ण व्यवहार, धरपकड र अनुचित कार्यहरू एक सेकेन्ड पनि नसहने’ एमाले कोशीको विज्ञप्तिमा उल्लेख छ।
एमाले उच्च तहले बारम्बार ‘धरपकड’ को कुरा किन निकालिरहेको हो, सरकारले त्यस्तो तयारी गरेको सूचना पाएर हो भन्ने प्रश्नमा सचिव राईले सरकारको व्यवहार र नियतले त्यस्तो देखाइरहेको दाबी गरे। ‘त्यस्तो प्रष्टै देखिएको छ,’ राईले दोहोर्याए।
एमालेका नौमध्ये एक जना सचिव राईले विराटनगरमा चुनाव असम्भव रहेको र हुनै नसक्ने ठोकुवा गरिरहँदा अर्का सचिव राजन भट्टराई भने पार्टीले मातहत कमिटीबाट उम्मेदवारको नाम मागिरहेको बताइरहेका थिए।
पार्टीले त्यसरी उम्मेदवारको नाम मागेकोबारे उपमहासचिव योगेश भट्टराईले महासचिव शंकर पोखरेललाई सचिवालय बैठक बोलाउन माग गरेका छन् भने केन्द्रीय सदस्य गोकुल बास्कोटाले आन्दोलन पनि गर्ने, उम्मेदवार पनि छान्ने भन्दै कटाक्ष गरेका छन्।
‘महाधिवेशनमा व्यस्त भएकाले र भर्खरै मात्र नयाँ कमिटी निर्वाचित भएर आएकाले तत्काल बैठक राख्न सकिएको छैन,’ मंगलबार सचिव भट्टराईले सेतोपाटीसँग भने ‘तर, मातहतका कमिटीले समानुपातिकतर्फ उम्मेदवारहरू भने सिफारिस गरिरहेका छन्। केन्द्रीय कार्यालयले नामहरूको रोस्टर पनि तयार पारिरहेको छ।’
फागुन २१ गते हुने प्रतिनिधि सभा निर्वाचनका लागि दलहरूले आगामी पुस १३ र १४ गते बन्द सूची पेस गनुपर्ने छ। दलहरूले विभिन्न क्लस्टर मिलाएर अधिकतम ११० जनाको सूची बुझाउनुपर्ने हुन्छ।
काठमाडौंमा उम्मेदवारको बन्दसूची बुझाउने तयारीमा लागेको दल कोशीका १४ जिल्लामा भने आन्दोलन घोषणा किन, कि आन्दोलन भन्दै यो पनि चुनावकै तयारी हो?
यो प्रश्नको जबाफमा सचिव शेरधन राईले अहिलेको सरकारबाट निर्वाचन सम्भव नरहेको बताए।
‘प्रतिनिधिसभा पुनर्स्थापना, सर्वदलीय सरकार, संविधान संशोधन अनि बल्ल ताजा जनादेशले मात्रै निकास दिन्छ,’ उनको भनाइ थियो।
आन्दोलन, अदालत र चुनाव तीन वटै अस्त्र प्रयोगमा जुटेको एमालेले कोशीमा अतिरिक्त आन्दोलन घोषणा गर्नुको कारणबारे नेताहरू सार्वजनिक रूपमा बनिबनाऊ धारणा मात्रै दिन्छन्। यद्यपि मंगलबार विराटनगर प्रदेश कार्यालयमा भेला भएका केही कार्यकर्ताले भने अध्यक्ष ओलीलाई कोशीमा कार्यक्रम गरेर बोलाउने तयारी भइरहेको हुनसक्ने बताए।
‘स्थानहद तोड्ने ओलीको अभिव्यक्ति आइरहेको छ, छानबिन आयोगमा बयान पनि दिन्नँ भनिरहेका बेला ओलीलाई ल्याउने तयारी गरेको हो कि भन्ने लागेको छ,’ ती कार्यकर्ताले भने।
तर, नेताहरूले भने यसबारे केही भनेका छैनन्।
-1746009348.jpg)
