कर्णाली प्रदेशका मुख्यमन्त्री यामलाल कँडेलले तोकिएको समयमै निर्वाचन गराउन दलहरूसँग सघन छलफललाई निरन्तरता दिनुपर्ने बताएका छन्।
बुधबारदेखि सुर्खेतको वीरेन्द्रनगरमा सुरू भएको प्रदेश सुरक्षा गोष्ठीलाई सम्बोधन गर्दै नेकपा (एमाले)का सचिवसमेत रहेका मुख्यमन्त्री कँडेलले प्रधानमन्त्री सुशिला कार्कीले प्रमुख दलका शीर्ष नेताहरूसँग गरेको संवादलाई सकारात्मक भन्दै त्यस्तो संवाद र छलफलले मात्र मुलुकलाई निर्वाचनमा लैजान सकिने बताए।
मुख्यमन्त्री कँडेलले प्रमुख दलका शीर्ष नेतालाई स्थान हद तोकेर निर्वाचनको वातावरण बन्न नसक्ने दाबी गरे।
‘दलीय व्यवस्थामा दललाई पाखा राखेर निर्वाचनको वातावरण सम्भव छैन,’ उनले भने, ‘निर्वाचन गराउने हो भने, दलहरूसँग निरन्तर सघन छलफल गरियोस्।’
सरकारका कतिपय गतिविधिकै कारण निर्वाचनको वातावरण अझै तयार नभएको दावी गरेका उनले प्रमुख राजनीतिक दललाई पाखा राख्ने सोँच त्यागे मात्रै तोकिएको समयमा निर्वाचन सम्भव हुने बताए।
दलहरूबीचको सहमतिले मात्रै निर्वाचनको वातावरण बन्ने भन्दै त्यसका लागि सुरक्षाको अवस्था मजबुत र भयरहित वातावरण निर्माणमा उनले जोड दिए।
जेनजी आन्दोलन पछि सुरक्षाकर्मीमा मनोवैज्ञानिक रुपमा त्रास कायमै रहेको भन्दै निर्वाचनको वातावरण बनाउन त्रसित मनोविज्ञान वाट सुरक्षाकर्मी मुक्त हुनुपर्ने बताए।
‘यहाँ व्यक्त नभएपनि सुरक्षाकर्मी साथीहरू एक प्रकारले मनोवैज्ञानिक रूपमा त्रसित हुनुहुन्छ,’ उनले भने, ‘उहाँहरूलाई दिइएको हतियार परिआएमा प्रयोग गर्ने वा नगर्ने द्विविधामा हुनुहुन्छ भने यस्तो अन्यौल अवस्थामा निर्वाचनको वातावरण कसरी बन्न सक्ला?’
भदौ २३ गते युवाहरुले उठाएको भ्रष्टाचार नियन्त्रण र सुशासनको मागप्रति कसैको विमति नरहेको, तर भदौ २४ गते भएको विध्वंश र आगजनीमा संलग्नको पहिचान गरी कारबाही नभएसम्म शान्ति सुरक्षाप्रति विश्वस्त हुने अवस्था नआउने उनले बताए।
-1746009348.jpg)
