नेपाली कांग्रेसको केन्द्रीय कार्यसम्पादन समिति बैठक आज दिउँसो केन्द्रीय कार्यालय सानेपामा बसेको छ।
मंसिर १५ गते ल्याएको कार्यतालिका अनुसार अघि बढ्न समयको अभाव हुने भन्दै बैठकमा तीन तहको अधिवेशन मात्रै गर्ने गरी अघि बढ्नुपर्ने विषयमा छलफल भएको नेताहरूले बताएका छन्।
कांग्रेसमा पुस १६ गतेदेखि वडा अधिवेशन सुरू गरेर ६ तहको अधिवेशन सक्दै पुस २६ देखि २८ गतेसम्म केन्द्रीय महाधिवेशन गर्ने कार्यतालिका छ। तर आजसम्म क्रियाशील सदस्यता नवीकरण र नयाँ वितरण काम सकिएको छैन।
क्रियाशील सदस्यता वितरणकै काम नसकिएकोले यस अघि ल्याएको महाधिवेशन कार्यतालिका प्रभावित बनेको छ।
त्यसैले वडा अधिवेशनको मिति केही पर सारेर तीन तहको अधिवेशन मात्रै गर्ने गरी छलफल अघि बढेको हो। पुस २० गतेतिर वडा अधिवेशन पुस २३ २४ गतेतिर क्षेत्रीय अधिवेशन र पुस २६ देखि २८ गतेसम्म केन्द्रीय महाधिवेशन गर्न प्रस्ताव गरिएको छ र यसमा केन्द्रीय कार्यसम्पादन समितिका सदस्यले धारणा राखिरहेका छन्।
महामन्त्री गगन थापाले महाधिवेशन गरेर मात्रै आम चुनावमा जानुपर्ने भन्दै तीन तहको अधिवेशन मात्रै गरेर जान सकिने प्रस्ताव राखेका थिए।
सभापति शेरबहादुर देउवा पक्षका नेताहरू भने अहिले महाधिवेशन गर्न नभ्याउने हो भने वैशाखमा गर्नुपर्नेमा छन्। चुनाव अघि महाधिवेशन गर्ने विषयमा सहमति नजुटे विशेष महाधिवेशन गर्ने महामन्त्री थापा पक्षको तयारी छ।
-1766562195.jpeg)
-1746009348.jpg)
