नेकपा एमालेका अध्यक्ष केपी शर्मा ओलीले सरकारले अहिलेसम्म चुनावको वातावरण नबनाएको बताएका छन्। बिहीबार काठमाडौंमा आयोजित कार्यक्रममा बोल्दै उनले राष्ट्रपति कार्यालय शीतल निवासमा दल र प्रधानमन्त्रीसहित छलफल हुँदा पनि परिस्थितिमा फेरबदल नआएको बताएका छन्।
‘अस्ति प्रधानमन्त्रीजीसँग कुराकानी भएपछि पनि कुनै परिस्थितिमा फेरबदल भएको छैन। परिस्थिति ज्युँ का त्युँ छ। निर्वाचन गर्ने मोटिभ त्यसपछि पनि सरकारको, कतै अलिकति सप्रिन्छ कि, आंशिक रूपमा पनि सप्रिन्छ कि भनेको देखिएन। त्यसो भएर परिस्थिति सप्रियो, निर्वाचन हुन्छ। त्यस्तो देखिँदैन। चुनावको वातावरण नै बनेको छैन, वातावरण बनाउनेतिर सरकारको ध्यान केन्द्रित भएको देखिँदैन,’ उनले भने।
जस्तो परिस्थिति आइपर्छ एमालेले त्यस्तै निर्णय लिने उनले बताए।
‘निर्वाचनको परिस्थिति बनाउँछ सरकारले, निर्वाचन गराउँछ सरकारले हामी निर्वाचनमा सहभागी हुन्छौं, बहुमत ल्याउँछौं, चुनाव जित्छौं, हामी त शान्तिपूर्ण वातावरणमा चुनाव होस्, स्वतन्त्र, निष्पक्ष, धाँधलीरहित चुनाव होस्, हामी त्यही समय पर्खिइराखेका छौं। हाम्रो भनाइ त्यस्तो परिस्थिति छैन। यो सरकारमा त्यो जिम्मेवारीबोध देखिँदैन,’ उनले भने।
-1746009348.jpg)
