नेपाली कांग्रेसका महामन्त्री विश्वप्रकाश शर्माले फागुन २१ को प्रतिनिधि सभामा उम्मेदवारी नदिने घोषणा गरेका छन्।
केन्द्रीय कार्यसम्पादन समितिको आजको बैठकमा बोल्दै उनले आफूले उम्मेदवारी नदिने बताएका हुन्।
‘हिजो पुस ९ गते झापा थिएँ, को उम्मेदवार बन्ने हो दाबी गरेर अगाडि आउनुस् भनेर आफ्नो क्षेत्रका साथीहरूलाई क्षेत्रीय भेलामै भनेको छु,’ महामन्त्री शर्माले भने।
यो कुरा आफूले गत वर्ष पुस २१ गते मेचीनगर झापाको धुलाबारीस्थित अतिथि सदनको कार्यक्रममा बोल्दै पनि भनेको उनको भनाइ छ।
‘आगामी चुनावमा उम्मेदवार बन्न इच्छुक साथीहरू अहिल्यैदेखि गाउँमा मेहनत गर्नोस्, म ०८४ मा उम्मेदवार बन्न इच्छुक छैन’ भनेर घोषणा गरेको थिएँ l तर पनि फेरि पनि सर्वसम्मत सिफारिस गरेकोमा झापा १ का आदरणीय साथीहरूलाई धन्यवाद दिएको छु,’ उनले भने, ‘आफ्नो `पावर´ ले भ्याएसम्म उम्मेदवार बन्ने l जित्दा त कुरै भएन, हार्दा पनि क्षेत्र नछाड्नेl एक क्षेत्रमा हारे अर्को क्षेत्रमा वा एउटा तहमा हारे अर्कोमा भए पनि उम्मेदवार बन्नैपर्नेl बाँचुन्जेल- क्षेत्र `कब्जा´ को सोच राख्ने ? सासले भ्याएसम्म मन्त्री रहिरहनु पर्नेl हाम्रो राजनीतिको यो प्रवृत्ति भत्काउन जरुरी छl’
उनले तीन पटक उम्मेदवार बनिसकेकोले यो पटक आफू उम्मेदवार नहुने बताएका छन्।
‘गत चुनावमा म आफ्नो क्षेत्रमा सीमित थिएँ, यो पटक देशव्यापी रुपमा पार्टीका उम्मेदवारहरूको साथमा पुग्नेछु,’ उनले भने, ‘मेरो आग्रह छ चुनावमा अनुहार बदलेर जानुपर्छ।’
उनले समानुपातिकतर्फ उम्मेदवारबारे भने केही खुलाएका छैनन्।
महामन्त्री शर्माले २०७० को संविधानसभा निर्वाचनमा एमालेका रवीन कोइरालासँग पराजय व्यहोरेका थिए भने २०७४ मा वाम गठबन्धनका राम कार्कीसँग।
२०७९ मा भने उनले एमालेका अग्नि खरेललाई पराजित गरेका थिए।
महामन्त्री शर्माले पार्टी नेतृत्व फेरेर मात्रै चुनावमा जानुपर्ने बैठकमा बताएका छन्।
‘मेरो आग्रह छ चुनावमा अनुहार बदलेर जानुपर्छ, बढीभन्दा बढी युवा र नयाँ साथीहरूलाई अवसर दिनुपर्छ,’ उनले भने।
महाधिवेशनबारे बोल्दै उनले कार्यतालिका परिमार्जन गरेर तीन तहको अधिवेशन गर्नुपर्ने बताए। वडा र क्षेत्रको अधिवेशन गरेर, पुस २६ मै महाधिवेशन गर्नुपर्ने उनको भनाइ छ।
फागुन २१ को चुनावको तयारी नपुगेको भन्दै उनले वैशाखमा निर्वाचन गर्न सबैले साथ दिनुपर्ने पनि बताएका छन्।
‘चुनाव हुन कि त सरकारले वातावरण बनाउन सक्नैपर्छ कि त सर्वपक्षीय संवाद र छलफल गरेर बैशाखमा चुनाव गर्न सरकारलाई सुझाव र साथ दिनुपर्छ,’ उनको प्रस्ताव छ, ‘संवैधानिक प्रश्न सम्बोधन गर्न फागुन २१ मा ७ प्रदेशको ७ क्षेत्रमा गर्न सकिन्छ।’
-1746009348.jpg)
