जनमत पार्टीका अध्यक्ष सिके राउतले पछिल्लो राजनीतिक दौडधूपप्रति कागलाई बेल पाक्यो हर्ष न विस्मात् भन्दै टिप्पणी गरेका छन्। पछिल्लो समय काठमाडौं महानगरपालिकाका मेयर बालेन शाहले शृंखलाबद्ध भेट बढाइरहेका छन्। बिहीबार मेयर शाहले ललितपुरको ज्वागलमा बसेर झन्डै १२ घन्टा विभिन्न राजनीतिक दलका नेता, जेनजी अगुवासँग परामर्श लिए। मिलेर अघि बढ्ने सन्दर्भमा सल्लाह–सुझाव मागे। यद्यपि उनी निचोडमा भने पुगिसकेका छैनन्।
उनले सिके राउतसँग पनि भेटेको चर्चा चलिरहँदा राउतले यसबाट मधेसले निकास नपाउने आशय व्यक्त गरेका छन्।
‘कागलाई बेल पाक्यो हर्ष न विस्मात्’ भन्दै सामाजिक सञ्जालमा उनले लेखेका छन्, ‘जजसलाई प्रधानमन्त्री–प्रधानमन्त्री खेल्नु छ, खेले हुन्छ, जजसलाई मन्त्री मन्त्री खेल्नु छ, खेले हुन्छ, जजसलाई जेन्जी–जेन्जी खेल्नु छ, खेले हुन्छ, जजसलाई नयाँ–पुराना खेल्नु छ, खेले हुन्छ। तर हामी प्रथमतः मधेसको मुद्दाले गर्दा राजनीतिमा होमिएका हौं,’ उनले भने।
मधेसको अवस्था, समस्या, राजनीतिक मुद्दा र समाधान देशको भन्दा पृथक रहेको उनको बुझाइ छ।
‘हामी यो देशमा गरीब, अशिक्षित, विपन्न, पिछडिएका, विभेदमा पारिएका, पीडित, शोषित, शासित, दमित, किसान, मजदूर र समाजका निम्न तथा पहुँच नभएका वर्गका प्रतिनिधि हौं। हाम्रा राजनीतितक एजेण्डा र समस्या भिन्न छन्,’ उनको दृष्टिकोण छ।
यो कोही प्रधानमन्त्री बन्दैमा, मन्त्री बन्दैमा, पुरानोको ठाउँमा नयाँ आउँदैमा, वा नयाँहरू मिल्दैमा समाधान हुने विषय नरहेको उनले प्रष्ट्याउन खोजेका छन्।
‘मधेस आन्दोलनको नै १८ वर्ष भइसक्यो, हामीले के कति उपलब्धि पायौं? र अगाडीको १८ वर्षमा पनि पाइसक्छौं भनेर भन्न सकिन्न। हामीले अझ दशकौं संघर्ष गरिराख्नु पर्ने हुन्छ। हामीलाई कहिले धेरै सीट आउला, कहिले एक सीट पनि नआउला, तर मूल कुरा के हो भने हामीले आन्दोलनको शंखनाद गरिराख्नु पर्नेछ, आफ्नो धारको आवाजलाई जीवित राखिराख्नु पर्नेछ, आफ्नो क्रान्तिको ज्वाला जीवित राखिराख्नु पर्नेछ,’ उनले भनेका छन्।
त्यसैले जनमत पार्टी यताउतिको कुरामा ज्यादा उत्साहित हुनु पर्ने कारण नरहेको र पार्टीका लागि यताउति भट्कि राख्नु पनि उपयुक्त नभएको विचार पनि व्यक्त गरेका छन्।
‘हामीले महिना, ऋतु वा एक निर्वाचनका लागि पार्टी एकता गर्ने नगर्ने, गठबन्धन गर्ने नगर्ने, मिलेर जाने नजाने सोचेर दिमाग खर्चिने पनि होइन, हामीले त एक सीट जिते पनि नजिते पनि दशकौंसम्म संघर्षका लागि तैयार रहनु पर्छ, क्रान्तिको मशाल जलाइ राख्नु पर्छ,’ उनले बताएका छन्।
-1746009348.jpg)
